“Mi filozofia entera fue ke a traves de la kukla, una ijika puedia ser lo ke keria.”
La kukla de Ruth Handler, la BARBIE fue introdusida en el Fuar de Juguetes de New York en 1959. Nasida komo Ruth Marianna Mosko en 1916 en Denver, Colorado, Handler era la ija de padres imigrantes de Polonya. Su kreasyon de la kukla Barbie, ke fue nomada por su ija Barbara, fue dezinyada komo un salto de kuantum en komo ijikas de edad de preadolesensia trokaron sus djugos de kuklas. Handler observo ke las ijikas estavan mas meraklias en projektar sus aspirasiones sosyales i seksuales sovre la kukla ke de ser sus “madres”. Mas de una miliarda de kuklas Barbie se vendieron desde ke aparesieron i las istatistikas mostran ke kuando estavan lo mas popular, se vendian 3 kuklas en kada 3 segundos. En los dalkavos anyos, las vendidas no estan lo ke eran i por esto la kompanyiya Mattel (fundida en 1945) esta inkluyendo adaptamientos kulturales i demografikos en muevas kuklas tambien kreando una mueva seria de 17 kuklas inspiradas por mujeres famozas en el mundo komo Amelia Earhart i Frida Kahlo. Ruth Handler muryo en 2002 despues de aver luchado por anyos kon un kanser de pecho. Ke su alma repoze en Ganeden!
