El Regalo Mirakulozo de la Fiesta de Purim mos va Alegrar en el mez de Marso

Esti SAUL Judeo-Espanyol
21 Şubat 2018 Çarşamba

El saver ensenyar i transmeter las valores kon amor i kerensia es una fakultad.

Kon las dulsuryas ke vamos a ofreser, vamos ensenyar tambien a la mueva jenerasion de konservar muestra identidad.

Konservar la kontinuidad i la pertenensia de las tradisiones relijiozas. Me akodri esta semana ke en la Perasha Mishpatim egziste 53 mitsvas. La 25 mos avla de “Tsedaka”.

Sera una okazion de ofreser a los menesterozos o sovre todo a afalagar a los muestros kon kara riente para dar gozo a muestro puevlo...

Las echas buenas i las enkomendansas se deven de azer kon un grande entusyazmo (Megila Ester). Se deve de aplikar i egzekutir los deveres i ser akavidodozos: Ke kere dizir de no deshar lo ke se deve de azer oy, al diya de amanyana.

Savemos muy bien ke se resive muncho mas de lo ke se ofrese. Rengrasiamos una vez mas el “HAHAMBAŞILIK EĞİTİM KOMİSYONU”, la komisyon edukativa del Gran Rabinato por sus inisiativas nombrozas.

Es una buena okazion de ofreser el livro PURİM (en Turko), ovra instruktiva ke ambeza el mez de Adar i sus maraviyas, ke se aparejo en 2011.

Un grande rengrasio tambien a todos los partisipantes por el livro sinyifikativo de la fiesta de Purim.

Para enkomendar este livro maraviyozo: [email protected]

Kerdos lektores, vos sueto alegria i pas.

Hag Purim Sameah.