La teknolojia i su progreso

Silvyo OVADYA Köşe Yazısı
14 Şubat 2018 Çarşamba

Ay sierta djente ke despues de una sierta aedad se enfasyan de bivir tan largo en este mundo. I si tyenen siertas hazinuras el problem es mas difisil. Si no tyenen problemes kon la kavesa tyenen la posibilidad de meldar i de mirar.

 Kada diya los ombres estan azyendo kozas muevas i esto todo mos esta dando siertas fasilidades.

Este fin de semana estava en Londres para ver a mi ija i mi inyeta. Biven aya ma mos vemos unas kuantas vezes al anyo. Viernes la noche estava en Paris i un diya despues me puediya ir a Londres. Me puediya ir kon avion ma esta vez dishe ke devo de tomar el treno ke pasa debasho de la mar. 75 metros debasho. I no es komo el tunel ke izimos en Estanbol para pasar de un kontinente al otro. Ke tura unos kuantos puntos kon la araba. El tunel de la Manch es 55 kilometros.

Mas de vente anyos antes por un Bayram aviyamos desidido de irmos a Paris. Ma komo no era posivle de topar bilyeto de avion tomimos los bilyetos pasando par Bruksel.

Kuando vinimos a Bruksel empesimos a asperar. Medya ora, una ora, dos oras...

Arivando a las 11 del diya alkansimos a las una de la demanyana a Paris en indomos kon otobus porke avia una grev de los lavorantes. Es dospues ke me ambezi ke el treno TGV (treno de alta velositad - train a grand vitesse) se va de Bruksel a Paris en una ora i unos kuantos puntos. Vitesh lo ke es la inyorensya? Anyos dospues 2-3 vezes al anyo empesi a vijitar un kliente en la sivdad Lille ke es serka de la Beljika i reelmente el treno se va en un tyempo de sinkuenta i piko de puntos.

El treno entre Paris i Londres tyene una velositad de 270 kilometros/ora. Ma en el ekran de la televizyon estava eskrito ke ka velosidad la mas alta fue de 327 kilometros/ora.

Agora esto eskrivyendo este artikolo tornando de Londres a Paris. La primera vez pensi ke el tunel devia ser klotrofobik. Ma komo era de noche no entendi. Ma asperimos unos kuantos puntos i dospues el treno estava mas kalmo kon una velosidad mas basha. Es kuando arivimos a Londres ke izyeron un anunsio dizyendo ke tuvimos siertos problemes en el tunel.

Reelmente en este siglo los tuneles ke se estan azyendo mos estan azyendo ganar muncho tyempo. De una sivdad a la otra... Sin estar dos oras antes en l’aeroporto i en no gastando las paras para el taksi.

Si ya estash meldando este artikolo devesh de entender ke torni sano i rezyo a Paris.

Esta semana diya de Alhad, kuando vash a vinir al Dia del Ladino / Judeo-Espanyol no vos espantesh ke vos va kontar mis viajes i los trenos. Es Karen i Jojo Eskenazi (Moiz), Izzet Bana kon su koro formado de mujeres ke se yama NES, Süzet Herman kon Anna i Karen, i Zelda Ovadya mos van avlar sovre las dichas. Vamos a ver el famozo filmo de Deniz Alphan sovre las ultimas komidas sefaradis i los ke no pueden mas avlar muestra lingua.

I por la primera vez, los mansevos organizaron siertos djugos ke se van a djugar kon todos los partisipantes - si keren. Vash a vinir kon vuestros inyetos ke son mas mansevos de sus 18 anyos...