Tu Bishvat

Şeli GAON Judeo-Espanyol
7 Şubat 2018 Çarşamba

Myerkoles la noche era Tu Bishvat ke se fyesta el 15 del mez de Shevat. El anyo muevo de los arvoles... El empesijo de la primavera.

Kada arvole es una bendisyon (kutsama) para el pais. Kon su ermozura adorna (süslemek) la tyerra i da solombra. Las raizes (kök) ke estan a las onduras de la tyerra la salvan de la erozyon.

Kada anyo selebramos esta fiesta kon toda la famiya endjuntos.  El seder konsiste de komer frutas muevas i de bever vino; para fyestar el anyo muevo, o para fyestar la yegada proksima de la primavera. Las mezas son yenas de frutas i produktos de la tyerra.

Trigo (buğday) i produktos derivados.

Vino, igo, agranada (nar), azituna, datile, uva, mansana, muez, banana, karota, melon i frutas sekas.

Despues ke se disho todas las berahas i se komyo todas las frutas, se toma un limon en la mano i en golyendolo se dize una beraha diferente. Es en Tu Bishvat ke Dyo desido ke los arvoles seran fruktiferos (meyve vermek), unos de eyos van a kreser, otros se van a sekar i se van a murir.

Egziste una uzansa vyeja ke endika a los padres: sembrar un sedro (sedir ağacı) kuando nase un ijo, i un sipres (servi ağacı) en el nasimyento de una ija. I en la boda de estos mansevos, los ramos (dal) de estos arvoles van a ornar la sinagoga ande se van a kazar.

Esta fyesta afirma la relasyon ke egziste entre el puevlo djudyo i su tyerra. Ya savemos ke el puevlo ebreo fue orijinalamente agrikultor (ziraatçi), i tiene un amor profundo por los arvoles. Estas selebrasyones mostran la emportansa ke dan los djudyos a esta fyesta.

Kale demandar esta demanda: Ke es tanto sinyifikativo en los arvoles, ke fyestamos sus anyos muevos?

La Tora dize: Deke la persona es un arvole de la tyerra? Ke es la sinyifikasyon de esto: Mos puedemos ambezar de los arvoles, kozas muy emportantes para muestra vida.

Los arvoles syempre tyenen una enfluensya pozitiva enriva de la atmosfera, del tyempo i del entorno. Eyos dan frutas, solombra (gölge), abrigo a las bestyas (hayvan), dan oksijen a la tyerra, avizan la erozyon i dan umiditad a la tyerra.

Tu Bishvat es la fyesta de la natura.

El arvole es el sembol de la VIDA i del SAVER.

La Tora es el orijin (kaynak) de la saveduria (bilgi), de la konosensya; es el oksijen de los djudyos. Ma, la konosensya no tyene valor kuando es sola, kuando no es entornada de otras kozas. Kale tomar fuersas de las tradisyones ke son muestros raises, para pueder tener un futuro reushido.

El ombre es komparado a un arvole del kampo porke kon sus kualidades syempre el se developa (kendini geliştirir), i a la fin i el da frutas, ke son los ijos.

Kale kontinuar a selebrar todas las fyestas, para ke los mansevos se ambezen muestras tradisyones i ke lo realizen fina la fin. Para kada anyo mijorado!