Renan Koen En El Kal De Los Frankos

Şeli GAON Judeo-Espanyol
24 Ocak 2018 Çarşamba

20.01.2018, Shabat la noche mos fuimos kon una amiga kerida al “Kal de lo Frankos” ke es la Sinagoga Italyana ande aviya un konserto eksepsyonal de Renan KOEN sovre la komemorasyon del “Olokosto”.

La Sinagoga Italyana fue fundada en el anyo 1862 debasho el patronaje del rey de Italya kon el nombre de “Komunidad Djudia de los Etranjeros”, Estambol, establesida en el Ritual de Portugal en Espanya (İstanbul İspanyol Portekiz ritinde kuruldu).

Los djudios de raizes (kök) italyanos son los dirijentes de esta sinagoga fabuloza ke tyene una facha (cephe) Gotika i eskaleras de marmol. Es una ovra de arte ke vale la pena de vijitarla. Una sinagoga antigua ke ay mas de 130 anyos ke esta sirvyendo la komunidad djudiya de Estambol.

El Presidente “Rıfat Behar”, los gabayes “Leon Esim” i “Mişel Horada” kon la sekreter Mme. “Violet” lavoran de alma i korason para ke esta sinagoga seyga syempre yena de djente en todo modo de eveniientos kulturales i relijyozos.

“Renan KOEN”, pianista, kompozitora (besteci), soprano i muzikoterapista ampeso a la muzika kuando teniya ocho anyos kon la fluta klasika (klasik flüt). En el anyo 1995, en la kompetisyon de “Chopin Etüt” gano el premyo de ser la kuatrena. I munchos otros premyos (ödül) en su karyera de piano.

Para Renan, la misyon la mas grande de la muzika es ke la muzika es unifikadora (birleştirici) i kuradera (iyileştirici); tyene una misyon de kurar a la persona kon los ritmos diferentes. Eya es una muzikterapista konosida i reushida en el mundo.

Fue envitada a los Kongresos de Muzikoterapia Mondial en la Gresya, en el Portugal i en la Austria. Esta kontinuando a los lavoros de soprano en mizmo tyempo del piano.

Renan Koen esta dando resitales, konsertos diferentes i esta kantando komo solista en diferentes orkestras.

El treser album de Renan Koen es sovre la vida de los kompozitores en la sigunda gerra mondial ke estavan enkarselados enserrados en el kampo de Terezin ande era defendido la muzika. Malgrado ke era defendido eyos kontinuaron a kompozar ovras muevas. La vida de estos kompozitores ke era veramente muy difisil, ma yena de esperansa de salvasyon.

En primero Rıfat Behar avlo en envitando a la Consul General de Italya “Federica Ferrari Bravo”, ke izo una avla enteresante sovre esta nochada. “Federica Ferrari Bravo” ampeso en dizyendo ke la Italya es un pais ke bivyo el fashizmo i munchos otros problemes i save muy bueno lo ke es el Olokosto. En 1945, kuando la gerra se termino los alemanes ke entraron a Auschwitz mataron a munchos djudyos i munchas personas de otras relijyones. Los ke salvaron de esta maldicha perioda no kijeron avlar para pueder olvidar i otros preferaron de avlar para komemorar.

“Esta noche mos arekojimos aki para ke no ayga ‘Nunka Mas’ (bir daha asla). Todo el mundo kale ke aga un grande esforso para ke no ayga este modo de diskriminasyon otruna vez. En el dor kuando estamos bivyendo, el rasizmo, la intolerensya i el fanatizmo relijyozo pujo muncho. Para no pedrer muestra umanidad, devemos de unirmos para pueder estar kontra el aborresimyento (nefret).

Vamos a komemorar kon Renan Koen endjuntos el Olokosto kon la muzika. Terezin era un kampo desgrasyado de no pueder bivir. Solo 7.000 personas puediyan bivir aya ma los alemanes metyeron 50.000 personas komo bestias. Es Viktor Ullman ke aseguro la solidaridad en el kampo. Gideon Klein, kon la kompozisyon ke izo, kijo transmeter lo ke se bivyo en Terezin a las jenerasyones vinideras i reusho a su buto.” Renan Koen disho ke Viktor Ullman kon Gideon Klein izyeron todo sus posivles para transmeter la “Rezistensya Positiva (pozitif direnç) fina oy kon sus muzikas. Krear muzika es avrir espasyos muevos en el meoyo. Kuando el kompozitor krea aze una grande kontribusyon (katkı) a su vida.

La primera ovra era de Viktor Ullman ke lo kompozo para sus tres ijos. Los sentimyentos muy diferentes, komo estavan en un kaos.

La sigunda ovra de Gideon Klein ke estava enfluensendo la persona.

La tresera ovra ke era un Kadish, Renan la tanyo en un “Armonium” istoriko ke parese al piano ma muy diferente.

Fue una nochada muy reushida kon muncha djente enteresada en esta muzika.

Kero felisitar a Renan para su talento en el espasyo de la muzika i le oguro munchas otras reushidades.