Las fasilidades de muestro siglo

 

Kuando era chiko, los parientes de mi madre moravan en Paris i este modo tuve la okazyon de vijitar la Fransia, Paris i munchos otros payizes. Era kuando teniya 3 anyos ke por la primera vez me suvi al avion. No se si era kapache de ir en una vez fin a Paris, ma ya me akodro ke izimos una estasyon (ara durak) en Milano.

I en los anyos 1960, 1965 i 1970 mos fuimos kon araba. Es djusto ke los kaminos no eran lo mizmo ma era una okazyon para vijitar munchos payizes. Mi padre i mi madre empesavan ocho mezes antes a lavorar para resivir un almanak de los oteles de un payis i del otro. I todo se aziya kon letras. Ma esto no era muy fasil por la Bulgariya i la Yugoslaviya. Kualo se aziya? En un viyaje no topando lugar en dingun otel en Sofya i serka de Sofya porke avia un Kongreso, mos kedimos en un motel – kamping en las tentas ma en las kamas. El kamping estava al lado de un chiko riyo. A la demanyana kuando mos alevantimos mi madre i yo estavamos auflados, modridos por los moshkos (sivrisinek). Mi padre i mi ermana ke no tenian sangre dulse no les afito nada. Durante 2-3 diyas estavamos irrekonosavles (tanınmaz durumda). I este modo vijitimos la Bulgariya, la Yugoslaviya, la Italya, la Suisa i la Fransia. Una vez vijitimos la Espanya. En esta epoka era un mazal de pueder vijitar payizes estranjeros. Ma kada vez sin rezervar los oteles. Una otra vez de muevo mos kedimos esta vez en la araba por ke no kijimos kedar en una kaza. Avia un Kongreso en Zagreb i dingun lugar en los oteles. Mos echimos en la araba, en una avenida prinsipal. I me akodro ke mos espertimos kon el bruido de una arozos (sulama aracı).

Oy todo troko. Ya savesh ke kuando es las vakansas del somestre, los mansevos ke lavoraron tanto tyenen derecho a un chiko viyaje. I desidimos kon mi mujer i kon mi ijo de ir a la Alemania, a Berlin. Una noche en el internet es un tyempo sufizente para rezervar los aviones para ir i vinir. I para rezervar los oteles. Mizmo para eskojer ke devemos de vijitar en mirando en el internet. Reelmente es muy enteresante de ver el trokamyento ke bivimos estos sinkuenta anyos dalkavo.

Kuando dishe a un amigo ke keremos ir a Berlin, kon una kara de amistru (somurtkan bir suratla) mos dize: no topatesh otro lugar para ir? Si, es djusto ke muestros korelijonarios, mizmo mi madre ke bivia en Fransia sufrieron muncho de los Alemanes en la epoka de la Segunda Gerra Mondial ma esto no deve dizir ke no devemos tener relasyones kon los miembros de esta Nasyon. Ay mas de 32 anyos ke me fui mas de vente vezes a este payis i tuve muy buenas relasyones kon munchos Alemanes. Mizmo un muy grande yerro no deve manchar una nasion fin a la infinidad (sonsuzluğa dek). Vemos ke oy en diya son la nasyon la mijor organizada en la Evropa, i la mas rika. Es muy enteresante ke saviyamos ke la Komunidad Djudiya posedava serka de trenta mil almas. Oy en diya si demandash kuantas almas posedan? Vos va dizir: mas de dosyentas mil! Si, no lo saviash; estash en un shok. Porke dyeron la posibilidad a los djudios Rusos i Ukranyezos (Rus ve Ukranyalı Yahudiler) de pueder bivir en la Alemanya i de pueder tomar la nasyonalidad. I vemos ke munchos Israelyanos estan bivyendo en este payis. Reelmente ke es muy enteresante. La semana venidero va estar kuatro diyas en este payis ma en el futur semanaryo vos va avlar sovre el Diya del Judeo-Espanyol/Ladino ke va tener un grande entereso por el publiko este anyo.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
363