La Ambisyon, una KUALIDAD o una FALTA?

Antes de topar la repuesta a la kestyon del titolo, kero relatar una refleksyon anonima ke meldi antes aun syerto tyempo: “Las personas tienen grandes pretansyones ma, chikos proyektos”...

Coya DELEVİ Judeo-Espanyol
17 Ocak 2018 Çarşamba

Yo penso ke la ambisyon moderada es una kualidad. Ma si es egzajerada o mal orientada, puede devenir danyoza. En la istoria se enkontra munchos kavzos semejantes. Djusto aki, se puede pozar esta kestyon: “una persona sin ambisyon no puede reushir o es kondenado a pyedrer en la vida? Sinseramente, puedo dizir ke no tengo una repuesta neta a tala kestyon, ma penso ke es un punto de vista bastante djusto i enteresante.

Jeneralmente, al empesijo de kualker echo o lavoro, ay syempre una ambisyon ke se puede eksplikar kon el dezeo de reushir. Este sentimiento es la baza, la razon fondamental de ampesar. Lo puedemos tambien konsiderar komo esperansa. Keridos lektores, no se mas komo se puede nombrar la fuersa ke arrepushe la persona i ke tiene diversos aspektos i formas.

Munchas personas dezean la reushita por orgolyo, otras, por el amor del Arte, de la Sensya, de la Literatura ets… Otros, por ganar moneda, titolos, onores o simplemente, para entrar en ojos de alguno/alguna. Aki, kero tokar un poko al kavzo de los djenitores ke son ambisyozos por sus ijos i ke luchan por sus reushita, munchaz vezes por kontentar sus propia ambision. En la vida puedemos enkontrar egzempyos semejantes.

Kontinuando kon la Ambisyon, al tino de la persona viene una kestyon kaji inevitavle. Es ke una fuerte Ambisyon puede ser un obstakolo delantre la Felisidad? No puedo responder kon un si o kon un no. No me esto akodrando aver enkontrado direktamente un kavzo semejante. Ma, penso ke en syertos kavzos puede ser un obstakolo. Kale ser razonavle i no dezear lo difisil o imposivle. Asegun mi, deve aver un syerto limito.

La persona mizmo si arrivo a la sima, i por modo de esto sakrifiko o diremos neglijo su famiya i sus amigos, entyende muy tadre ke se yerro. Ay probabilidades ke un syerto tyempo va konoser regretos o otro modo de sentimientos negativos, malgrado su briyante reushita. Syertas realidades de la vida son amargas. Djusto aki kero relatar una dicha sinyada David de Brueys: “La Ambisyon en orientando muestros ojos verso el avenir, mos detiene de gozar el prezente”. Me parese ke no ay menester de komentaryo…

En vezes penso ke djente sin grande ambisyones tienen mas munchas shanses de ser kontentes de sus suerte, son orozos. Esta sezudeza no la tenemos todos. O, puede ser me esto yerrando? En vezes penso ke la shans tambien puede ramplasar la Ambisyon. Ke pensash keridos lektores?