Arresıvyendo El 2018

Coya DELEVİ Judeo-Espanyol
4 Ocak 2018 Perşembe

Este teksto ampesi a eskrivirlo oy, Shabat 30 desembre 2017. No manka semanas, ni afilu munchos diyas... Es solamente oras ke mankan para entrar al anyo muevo. Kon la ekspresyon de muestra kerida amiga, Karen Şarhon, estamos aparejandomos a “embiyar el 2017 a la eternidad” i a resivir el anyo muevo. I, komo de uzo, komo en kada anyo, estamos ekspresando muestras esperansas i oguros.

Todos lo savemos ke, mas o menos se izo uzo o mizmo mas ke uzo, se izo komo un klishe de suetar felisidad, prosperidad i siguro sanedad. Naturalmente son ermozos suetos i naturalmente no tenemos nada kontra. Lo ke kero oy, en este fin de anyo es azer komo un bilanso de la situasyon en jeneral. Keridos amigos, no tengo entisyon de dar un diskorso(!) largo en todo kavzo...

La sanedad reelmente es un trezoro ke posedamos. Ma, ke pekado ke mos rendemos kuento de su valor, kuando la peryemos o estamos para peryerla. Alora devemos konvenir ke la sanedad es un elemento esansyal de la felisidad. Vinyendo a la prosperidad... Ke valor tyene la rikeza, si no ay paz ni repozo en el mundo? Paz i repozo... otros dos elementos importantes para ser feliz.

Dunke, keridos amigos, a los suetos tradisyonales, (si se puede dizir ansi) penso ke devemos adjustar la paz i repozo en el mundo entero. Un Universo sin gerras, sin terrorismo, sin matansinas, parese komo un suenyo. Ma, muestro dezeo, muestro sueto unanimo es:

KE NO KEDE EN UN SUENYO

Esto pensando, pensando...

Puede ser me esto sonyando...

En un derredor de silensyo,

Esto es mas ke un suenyo...

Espyerta, kon ojos avyertos,

Es la ekspresyon de mis suetos...

 

En mi suenyo...

No aviya semeja de gerras,

Ni mas personas en lagrimas.

No aviya ni trasa de rasismo,

Ni dinguna boz de terrorismo.

Adulto, mansevo i kriatura,

Se olvidaron la ambyertura.

En los korasones semyentes,

De una dulse induljensya,

I, sentimyentos semejantes,

De una grande tolerensya...

Paz en el mundo entero,

Un suenyo inkreivle, vero...

 

Sueto al nombre de la Umanidad,

Ke este suenyo devenga realidad...

Coya Delevi, Desembre 2017.