Buenos Oguros para el Muevo Anyo 2018

A la fin de kada anyo tenemos oguros para el muevo anyo ke va vinir. En kada anyo tenemos dias buenos i malos. Esto es la vida ama ay unos anyos ke mos keda en el tino no por sus dias buenos ma por sus dias de tristeza. Para mi este anyo siempre va ser el anyo kuando peryi a mi ermaniko, Moris Gerson en supito, kon una kriza de korason ke tuvo en la kaye i ke no alkanso mizmo asta el ospital. Asta ke mi kunyadika se fue al ospital, ya se aviya bolado. Esto es una tristeza muy grande. Peryita de padre i madre, aun ke es muy trajiko, yene se aspera por ke esto es la sira. Es kuando uno se va mansevo, ke es trajedia verdadera. No es muy fasil de deskrivir los sintimientos ke tuve en peryendo a mi ermano. Un sintimyento de soledad pura, un sintimiento ke no me kedaron dingunos de mi famiya propia, aun ke tengo marido i ijika, ke no me manken. Esto es diferente. Los tuyos, papa, mama, ermano, ermana, son shaetes de tu vida de chikez i manseves. Son los solos ke se akodran de tu vida de akeyos tiempos. Desde ke peryi a Morisiko, komo lo yamavamos, ke todo lo ke esta pasando delantre de mis ojos son las shenas de muestra chikez, las kazas ande bivimos en invierno i en enverano, komo djugavamos, komo mos peleavamos, komo riyiyamos i komo pasavamos el tiempo. Kuando eramos chikos, mi ermano era muy flakito porke no komiya nada, teniya manyas! Mi madre siempre aziya las mas ermozas komidas para ke el koma, ma asigun tornava la kavesa, las ermozas koftikas pasavan a mi plato i yo me las englutiya en duna sin ke se apersiva nada mi madre! En enverano, en Büyükada, mi ermano siempre se suviya a la bisikleta, se suviya a los arvoles i siempre tenia los dizes yenos de yaras! Tantas memorias, tantas shenas komo un filmo.

Tambien uvo munchas ermozas kozas en este anyo de 2017. Lo ke oguro para todos por este muevo anyo 2018 es un anyo de salud buena porke kon salud buena viene la felisidad.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın