Shabat ultimo me fui a Eskişehir a las sesh de la demanyana kon un grupo organizado por dos amigos entimos. Un otobus kon 42 personas todos konosidos djusto
komo una famiya. Un kamino de sinko oras kon una giadera (rehber) eksperimantada sovre esta sivdad.
A las 8.30 arivimos a Sapanca para azer un dezayuno kon todo djusto. A la fin arivimos a las 11.30 i sin ir al otel, empesimos a konoser la sivdad.
Una sivdad chika, limpya, ordenada ke tyene 800.000 abitantes. Los 80.000 son estudyantes en las dos universitas ke ay aki. En la universidad Anadolu ay 40.000 estudyantes. Una sivdad aklarada yena de mansevos.
La giadera dandomos detalyos kon el mikrofon, mos fuimos a vijitar el museo de arkeolojiya; un museo de dos etajes muy ordenado. En este museo aviya egzempios de munchas sivilizasyones komo Hitit, Frigia, Perso, Romano, Bizantino i la sivilizasyon Otomana. 22.500 ovras se topan aki, ma solamente 2.000 ovras son ekspozadas.
Pasimos por un parko, “Kent Park” ke es uno de los mas ermozos parkos de Eskişehir. Se topa en el bodre del chiko rio de Porsuk, ke es el braso el mas emportante del rio de Sakarya.
En Kent Park puedemos ver una plaj artifisyal, pisinas, restorantes, kafes, un lago (göl) artifisyal, munchas statuas i sovre todo una vedrura maraviyoza, un aver limpyo, las personas kon grande kalmo kaminando kon karas riyendos, sin stres, sin koryer…
Despues del komer de midi, mos fuimos al parko de Sazova. Es un parko de sensya (bilim), de kultura i de arte.
Aki ay un sentro de sensya, una pisina artifisyal, una guerta zoolojika, sentro de kultura, amfiteatro, una kaza de espasyo (uzay evi), un barko de pirat (korsan gemisi), i un treno para azer el torno del parko en 15 puntos.
Alhad demanyana mos fuimos a un lugar ande se esta formando los vidros de kolores i de formas diferentes. Un echo muy apenozo i ke se kere muncha pasensya i talento.
Veramente estava muy enteresante. Despues mos fuimos ande se vende las espumas (lületaşı).
Lo mas enteresante fue la vijita del museo “Balmumu Heykeller Müzesi” - Muzeo de Sera, ande se topa 200 statuas. Personajes etranjeros de los estados, los artistos, los jurnalistos, los esportivos, i sovre todo la majorita de las statuas reprezentando Atatürk i su famiya.
Un museo ekstraordinaryo komo el museo de
“Madame Tussaud” en los paises etranjeros. Este museo se avyo en el anyo 2013.
Eskişehir es una sivdad ke da grande emportansa al arte i a la kultura. El vidro es un objeto emportante en muestra kultura. En el muzeo kontamporeno de los artes de vidro esta ekspozado 60 ovras ke apartyenen a los artistos turkos i 10 ovras ke apartyenen a los artistos etranjeros.
La fineza, las kolores, las formas diferentes estava koza de ver… La ekspozisyon de la kavakadura del papel “Kağıt Oymacılığı” es un arte muy difisil ke toma muncho tyempo.
Ma una maraviya al ver.
En Eskişehir puedemos ver todo modo de artes, de ekspozisyones, una diversidad de aktivitades sosyales, de muzeos, de ovras de mano, una limpyeza inimajinavle , las kayes briyando, los parkos, las vedruras ordenadas, las personas respektuozas….
Esta sivdad es la ventisinkena de Turkiya yena de djente.
Lo mas ermozo fue dar un torno de 15 puntos kon una barka en el Porsuk Çayı. Aviya i Gondoles komo Venezia, ma komo el tyempo estava yelado no mos pudimos suvir al Gondol. Una sivdad komo Venezia, dando el torno kon la barka en el rio de Porsuk entre los pontes mos agrado muncho. Los dos bodres yeno de restorantes, pabes, kafes muy modernos i ermozo de ver.
Fue una fin de semana agradavle, repozada kon konosidos avlando, burlando i riyendo leshos del stres de Estambol.
Kero remersyar a “Mordo Hazak” kon “Cako Uyar” ke organizaron este viaje kon muncha atansyon para ke todos esten kontentes, sin mankura de nada i kon muncha veluntad.
Al vermos serkamente!
