Dora Treves
Keridos i keridas lektores,
Oy vos kero eskrivir sovre un poko de nostaljiya, de los objektos ke empleyavamos en mi chikes.
La semana pasada demandi a mis amigos en el grupo sefaradi si ay ken save lo ke es “taraba”. Apenas demandi ke me respondyeron lo ke es, i afilu kon su demaziya. Por siguro ke ya avra muncha djente ke saveran lo ke es taraba, ma yo yene vo lo va eskrivir.
“Taraba” es una platformo, una chikma de tavla ke se montava afuera de la ventana del mupak en el aydinlik. Ensima se metiya i un almaryo de tel ande se guadrava las komidas gizadas. Esto era una forma de yelador de estonses. Siguro ke no yelava las komidas ma las protejava de moshkos i moshkas i las prezervava de la kalor. Ensima la taraba, al lado del almaryo se metiya las komidas para ke se tivyeran. Aparte de esto estonses merkavamos kalupes de buz kuvridos kon polvo de tavla (talaş) ke lo prezervava de derritirse. Para no tashideyar el kalup ke era bastante pezgado de ariva se alargava un sesto atado a una kuedra i se travava el sesto kon el kalup ariva. No aviya asansor. Era todo suvir eskalones. Ma en la chikes ke emporta de suvir tres, kuatro eskaleras. Neyse, lo azere kurto, este kalup se rompiya en mas chikos pedasos i se metiya al deredor de las komidas para ke no se bozeyen.
Agora esto komo de primitivo ke les vyendra a la manseves de oy. No se pueden imajinar lo ke es de no egzistir el yelador (frijider) i tampoko el telefon entelijente ni la televizyon ni todo modo de teknolojiya del diya de oy. Komo esto ay tantas kozas ke vos kero kontar; por egzemplo la sobika de lenya ma agora ay kalorifer, la makina de lavar entonses viniya lavanderas para lavar los chamashires. Teniyamos una forma de termosifon ke kayntava la agua kon lenya i mos lavavamos una vez a la semana; agora el punto ke keremos mos lavamos; la agua kayente esta pronta al punto. Kuando eramos kriyaturas, djugavamos en la kaye sin aver dingun espanto kon las amigas i amigos de la maalle. Kada uno de mozotros tendremos munchas estoryas de akodrarmos ma i un poko deshare a vuestra imajinasyon i memorya.
Dainda no lo vimos ma en serka ke vamos a ver la pyesa “Kula ‘930” esto muy sigura ke este modo de memorias las vamos a topar kon muncho mas savrozor. Es de no piedrer de irvos a este evenimiento.
Al vermos.
