Diya de la Kultura Evropea Djudia

  Shabat i alhad no estava en Turkiya. Estava en Israel por dos dias para la boda de una prima de mi mujer. Kuando torni el Lunes demanyana imedyatamente telefoni a Nisya İşman, direktrisa del Muzeo Djudio para demandarle kuantas personas vijitaron el muzeo, el Templo de Neve Şalom i las aktivitades dia de alhad. I me disho ke mas de 1.300 personas vijitaron el muzeo i la sinagoga en este diya de la Kultura Evropea Djudia. Kualo eran las aktividades en este diya? El Konsul Onoraryo del Portugal, el Sinyor Aaron Nommaz avlo sovre su livro “El Espion Jozef Nasi” ke fue un personaje muy emportante en la istoria de los Marranes, mizmo en la istoria de los Djudios Osmanlis. Aviya el filmo “Hermana” ke es un filmo kurto dokumentaryo sovre los Djudios Ankaralis. Despues de midi aviya un konsyerto de los muzisyenes Cenk Rofe i Ediz Bahar kon el titolo “De la Muzika pop a los muzikales”.

  La istoriana Izmirliya, Dr. Siren Bora avlo sovre su livro dalkavo “Los Djudios de Anatolia” ande esta insistyendo ke la istoria de los djudios en las tierras empeso antes 2.600 anyos. Komo la Anatolia es las tierras las mas emportantes para todo modo de sivilizasyones, tyene una grande valor mizmo para los djudios.

  Kada anyo en este dia, el Neve Şalom o el Muzeo organizan una boda reprezentada (temsili) en el Neve Şalom. Es muy kuryozo ke dia entero los ke asistyeron a este dia eran personajes non–djudios. I para la boda la mas grande partida eran miembros de muestra komunidad komo era por la primera vez ke vinian a una boda! Reelmente muy kuryozo. Muestro buto era de azer esta aktividad para ke el puevlo tope la posibilidad de ver una boda djudia.

  En este diya avia tres ekspozisyones en el Muzeo. El primer era la ekspozisyon de minyatures sovre los Kostumes Djudios en el Imperio Otomano. La segunda era una ekspozisyon sovre las Sinagogas de Estanbol kompozada de artistos de fotografia ke son edukados por el Sinyor Alberto Modiano. La tresera era una ekspozisyon de karikaturas organizada por el famozo karikaturisto, Izel Rozental. Izel mos dio una konferensya en este dia intitulada: “So Turko, Djudyo i Karikaturisto.”

  Es muestra amiga Karen Şarhon ke dyo una prezentasyon sovre la Muzika Sefaradi. En este dia tres eskrivanas tuvyeron la posibilidad de sinyar (imzalamak) sus livros: Selin Feldman Nahmiyas; İdil Hazan Kohen i Ester Almelek.

 Reelmente fui muy kontente de ver ke tanta djente toparon la posibilidad de partisipar a este diya i espero ke esta aktivitad se va repetar kada anyo.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın