El Kanton De Dora Treves
Buenos diyas i bienvenidos a este kanton ke a la fin i a mi me se fado eskrivir unos kuantos biervizikos en el Şalom. Dishe eskrivere de gizados i dulsuryas. Ke mos se aga todo dulse i kon savor de boka.
Es muy siguro ke todas i todos ya savemos gizar. Ma para la manseves de agora ke todos estan lavorando diya i noche i ke no tienen muncho tyempo de ambezarsen, puedeser ke les aprovecha unas kuantas reseftas ke va provar de eskrivir.
En primero empesare kon:
BOREKITAS DE BERENDJENA ke a muncha djente les plaze.
El materyel para la masa de las borekas es:
2 kupas de azete
1 kupa de agua
Un poko de sal
Una piska de asukar
Un punyado de kezo kasher seko rayado delgadiko
Una kuchara de supa de vinagre
Arina serka de 800 gramos
Lo amariyo del guevo para untar enriva.
El gomo:
2 berendjenas bostan de las grandes
Una kupa de kezo kasher del seko rayado delgadiko
El blanko del guevo
Una piska de sal
Una piska de asukar.
Las berendjenas se asan i se alimpyan de las kashkaras. Se lavan, se azen eskurrir en un trepito i se apretan para ke se vaya la agua demaziya. Se meskla kon el kasher, el blanko del guevo, la sal i la asukar.
Para azer la masa:
Todo el materyel de la masa se meskla bueno fina ke se aze una masa blandika komo la sustensya de la oreja. Se aze asperar 2 oras en el yelador. La masa ya esta pronta.
Para azer la boreka: Se toma un pedasiko de la masa, se avre delgadamente. Se mete aryento una kuchara del gomo i se serra en forma de medya luna kresente. Se unta el amariyo del guevo kon furchika i se ensembra un poko de kasher rayado.
Todas las borekas se meten en un tifsin de orno. Despues, se kozen en el orno a 200o por 50 minutos. I se kome kon salud i beraha.
