La situasyon dospues de los referandum

Dos dias antes ke estash meldando mi artikolo, me esto ambezando de dos novelas: la primera es ke el Sinyor Barzani dyo la desizion de demisyonar de su posto de prezidente. Deke? Dospues de un referandum ande tuvo 95% de votos afirmativos (olumlu) por la independensya de un estado Kurdo. Ma esto no fue sufisiente porke vemos ke no tenia un apoyo sufisiente para ser patron de un payis. Dia de alhad, estava dizyendo ke los Amerikanos i ke el Estado sentral de Irak no fueron korrektos i dospues ke resivyo mas de 95% de votos por la independensya fue ovligado de demisyonar. I su demisyon fue achetada kon la majorita del parlamento. Vemos ke oy en diya la DEMOKRASIYA es diferente de lo ke saviyamos.

Diya de lunes a la tadre oyi en las enformasyones un haber ke me sorprendo (hayrete düşürdü). Ke era este haber? El prezidente, la primera ministra i un alay de diridjentes del Estado de Katalunya se refujyeron a la Beljika ke fue el estado ke les diyo esta permisyon. Ke yerro izyeron? Sin tomar dingun apoyo dyeron karar de fondar un muevo estado. En Katalunya kreo ke no es muy difisil de ganar un referandum para la fondasyon de un estado Katalan. Ma kale pensar lo ke va afitar dospues.

En muestro siglo mizmo los rezultados de las eleksyones no mos da la idea final de lo ke pensa el puevlo. Mizmo si ay una grande mayoriya de una vanda, esto oy en diya no es el sinyal de una desizion definitiva.

Oy en diya mizmo en las demokrasiyas los ke tyenen la majorita no tyenen el derecho de pueder ser mas fuertes i poderozos. Ma no es muy kolay para los ke tyenen esta superyoridad de dominar a los ke no tienen la majorita. Kreo ke no era la mizma koza mizmo dyez anyos antes. I los rezultados de las eleksyones eran muy emportante porke todas las partes respektavan los ke ganaron i los ke no ganaron! Ma oy en diya los ke ganaron keren dominar i no keren partajar lo ke posedan. Reelmente es una situasyon muy problematika.

 En unos kuantos anyos vamos a bivir siertos problemes en la situasyon del mundo. Mizmo los payizes ke tyenen un governo elijido van a bivir siertos problemes ke no va ser muy kolay de rezolver. Espero un futuro muy produktivo para muestros ijas i ijos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın