Una amiga presioza - Nuriye Franco, (z”l)

Esti SAUL Judeo-Espanyol
25 Ekim 2017 Çarşamba

Nurika Franco, una grande damma intelektual i simpatika, miembra egzemplaria de muestro grupo de arte de pintura, ke tuve el plazer de ensenyar por una ovra, mos va mankar, malorozamente.

Kon su esprito umoristiko mos alegro, mos komuniko inspirasion, motivasion, i “la joie de vivre” - la alegria de bivir.

Su volunta de kontinuar la aktivita artistika (la pintura en pleine air) malgrado su baston, era remarkavle.

Artista Nurika, kon su kontentes, partisipo i kreo desde munchos anyos.

Sus ovras son delikados desenes naives, kolores pasteles realizadas kon su proprio stilo: Naturas muertas, o pastorales, de kolores a kolores, estetikas i armoniozas. Sintimos siempre un grande plazer de estar endjuntos...

Kuando a la fin de la seansa artistika, mos enkantavamos en viendo su kompozision figurativa, la felisitavamos. Las amigas topavan ke era eya ke reushiya sus kompozisiones.

Kon su riza sinsera, burlandose de si para si, mos dizia:

“NO SAVESH A KEN TENESH ENFRENTE DE VOZOS!”

Me ambezi muncho de mi amiga de 98 anyos, la kerida Nurika Franco.

Realmente era mi eleva preferida. Siguro ke todas las 10 amigas eran muy artistas; diskutiyamos del arte PLASTIKA kontemporaneo tambien i kaminavamos muzeos i galerias...

Tuve la shans de ser invitada, kon mi espozo Viktor, a su kumpleanyos por sus 90 anyos, en LA CASA D’ITALIA DE ESTAMBOL, preparado por su ija, Dr. LYDIA ALBUKREK... En este dia memorable, Lydia supo reunir la famiya entera - ijos, inyetos i ninyos de inyetos ke biven en el estranjero. Un spektakolo uniko de kalor familyal arrelumbro la atmosfera.

Estavamos todos prezentes en la sala bien ornada, las mezas preparadas kon flores, kuando Nurika aparesyo delantre de la entrada. La ekspresion de su sorpreza djustifiko la importansa de la resepsion.

Bushkando a krear lo ermozo i su filozofia de la vida nunka sera olvidada. Sueto ke la grande damma Nurika Franco repoze en pas.