De Las Vegas a Barcelona

Silvyo OVADYA Köşe Yazısı
4 Ekim 2017 Çarşamba

Esta semana empesimos kon el masakro de un amerikano en Las Vegas. Ke desgrasya! Un ombre aedado de 64 anyos, un amerikano; del  trenta i dozien etaj de un edifisyo  empeso a matar i a travar su arma sovre la djente ke estavan en un konsyerto. Sovre ventisinko mil personas! No es reelmente rezonavle de ver un asasino kon su arma otomatika i reelmente profesyonal i reusho a matar serka de sesenta personas (58 noche de lunes). Savemos ke ay mas de kinyentos feridos (yaralı). No mos puedemos imajinar ke este modo de masakre no viyene al tino mizmo de un loko. Komo Las Vegas es una sivdad yena de animasyones malorozamente la mas grande partida de la djente no entendyeron lo ke estava afitando. Mizmo una grande partida estavan kontentes de pueder ver el fuego artifisyel (havai fişek gösterisi) ke no se realizo i ke era el bruido de la arma otomatika. El evenimyento se realizo en un konsyerto ande trenta mil personas i no tan mansevos se topavan en un lugar avyerto. Este masakro fue achetado por el ISIS, ma no fue achetado por la Polisia Amerikana porke no toparon  dingun dar i aver entre esta organizasyon i esta persona. Esta organizasyon terorista se apropriyo mizmo del atako ke se realizo en Marsilya ande dos mujeres fueron matadas kon un kuchiyo ke se topava en la mano de un asasino. Puedeser ke mos vamos a ambezar la razon de este masakro. Ma savemos ke esta desgrasya topo fin kon la muerte del asasino ke se mato kon su arma. La polisia ke es insufizyente kon un ombre ke esta matando de un edifisyo, del trenta i dozien etaj.

En los Estados Unidos, deke la djente es muy merekiozo para tener todo modo de armas? No saviya ke ay mas muncho armas ke almas en este payis. Kuatroshentos milyones de armas. Reelmente es un shifro inkreivle (inanılmaz). Espero ke kon una mueva ley van a limitar esta desgrasya. En los sinkuenta anyos dalkavo serka de un milyon de amerikanos fueron matados kon los atakos armadas. Reelmente es muy difisil de kreer. (Komo me vino muy godro este milyon, antes de eskrivir este artikolo miri unas kuantas vezes en el internet i malorozamente ke era un shifro reel i no egzajerado.)

Diya de alhad Barcelona, la sivdad la mas biva, la mas turistika i aktiva de la Espanya fue la shena de munchos aktos. Los Katalanes organizaron un referandum ke los Espanyoles no keriyan; kijyeron ke la Katalunya se esparta (ayrılsın) de la Espanya. Alhad la ekipa de futbol Barcelona djugo su mach sin dingun espektador. Mizmo demandaron ke Barcelona tome lugar en el Premier Liga (Inglez) i no ke tome lugar en la liga Espanyola!!! Malgrado ke reusheron a ganar kon un grande porsantaje, kreo ke este rezultado no va ser achetado por la Espanya ni por la Unyon Evropea. Porke dospues la espartisyon de los Inglezes, la Unyon Evropea no kere piedrer otros myembros. Si egzaminamos el kavzo, los Katalanes kijyeron esta separasyon de punto de vista ekonomika. En Espanya tienen todo modo de libertad de punto de vista linguistika (pueden avlar el Katalan); en las eskolas tienen todo modo de libertad... Ma savemos ke esta rejion, la Katalunya es la mas rika de la Espanya i los vente por syen de los revenidos del payis son afrontados (karşılanmış) por esta rejion. Savemos ke Barcelona es la sivdad ke resive lo mas muncho de turistos en la Espanya (el anyo pasado la sivdad de Barselona de 1,6 milyones de sivdadinos arresivyo 32 milyones de turistos, i mizmo kon una mueva ley keren limitar el nombre de turistos ke vijitan esta sivdad. Ke felisidad!!! (ne mutluluk)

De punto de vista de los Sefardim, ke dezgrasya: asperimos kinyentos i ventisinko (525) anyos para tomar atras la nasyonalidad Espanyola; i puedeser no vamos a tener la posibilidad de bivir en Barcelona. Puedeser ke vamos a asperar otros kinyentos i ventisinko anyos para ser Katalanes. O puedeser los ke tienen alkunyas katalanes van a ser achetados komo sivdadinos en la Katalunya!

Mas muncho gana de paz, mas muncho pletos i gerras. En la Evropa tenemos el doble de payizes ke teniyamos trenta i sinko anyos antes (kon la Rusia i la Yugoslavya). Kero ke la paz reyna en muestro payis, en muestra rejion i en el mundo entero.