El Legado de Muestra Kerida Klara Perahya

Karen GERSON ŞARHON Judeo-Espanyol
4 Ekim 2017 Çarşamba

 

La semana ke peryimos a la kerida Klara, no teniya dinguna duda ke su legado iva kontinuar sin dinguna difikultad ma paso una semana i na ke estamos tenyendo problemas para inchir la oja de Judeo-Espanyol en el Şalom, koza ke nunka afitava kuando Klarika, komo la yamava yo, estava kudyandola. Ya aviya kaji un anyo ke yo aviya tomado la responsabilidad de kontrolar i editar todas las eskritas ke mos viniyan en kada semana i pensi ke no iva aver problemas kontinuar la pajina en Judeo-Espanyol del Şalom. Bueno, se esta vyendo ke no esta muy fasil la koza.

Kon este artikolo miyo, esto aziendo una yamada a todos los amantes del Judeo-Espanyol en el mundo ke se metan a eskrivir una kozika (chika - 300 palavras, o larga - 600 palavras) EN KADA SEMANA para muestro kerido periodiko Şalom. Ya ay kaji 14 anyos ke estamos publikando El Amaneser, i es kon grande orgulyo ke vos digo ke nunka, desde el empesijo tuvimos un manko de materyal.

Oy en dia, tenemos materyal para los 6 proksimos mezes! Ma el Şalom deve de ser mas al koryente de las kozas, un poko mas aktual i el lugar ke se puede tener en El Amaneser no se puede tener en el Şalom ma i la pajina del Şalom es ideal para los ke keren dar una nuvela importante, un haber aktual i mizmo eskrivir una anekdota para el entretenimiento de los lektores. Puedemos mizmo avrir una chika seksion de dichas i proverbos para los ke son amatores de este modo de eskritas i las publikamos kon plazer si mos dan la sinyifikasion de las dichas i los proverbos i mizmo si mos eskriven un chiko dialogo en metiendo lo ke estan dando en konteksto para ke los ke keren ambezarsen entiendan kuando uzar estas dichas.

Ayde, amigos, tomá el kalem en la mano i empesá a eskrivir lo ke puedesh, i embiyame a mi adreso elektronika kuando puedesh: [email protected]

Ya ay 10 dias ke esto en Madrid, Espanya. Vinimos la famiya entera en primero para instalar a mi ija ke va estudiar aki durante un anyo i despues en profitando de la okazion ke me topo aki, para dar una seria de konferensias en Madrid i en Sevilla. Siempre kuando vengo a Espanya, me sorprende de ver a los Espanyoles ke tanto paresen a las tias i tios muestros, los sefaradis, ke biven en Estambul. La manera de avlar, la manera de jestikular kon las manos i kon los brasos, la manera de ser djente kayente ke siempre son muy intimos pishin te konosen i siempre te dizen “Hasta Luego” en dandote bezikos! Me enkanta esta djente de verdad ke me azen sintir komo si ke esto entre los miembros de mi famiya. En verdad ke es un sintimiento muy espesial, espesialmente para los sefaradis ke konosen el Judeo-Espanyol i sus kultura. Mi marido tiene los mizmos sintimientos i se topa muy konfortavle en este pais. En diez dias ya esta entendiendo el Espanyol moderno i mizmo avlar muy trankilamente si no presto komo eyos lo avlan! Mi ija (21 anyos) ke estudio Espanyol en el lise i ke no lo avlo en sus 3 anyos de universidad en Israel, ya esta avlando i entendiendo kaji todo.

La primera konferensia ke di fue en el Centro Sefarad-Israel, en Madrid, sovre “Los Tangos Sefaradis” i el CD muevo ke esta en el momento de salir a la plasa. Me demandaron ke la aga la konferensia en Judeo-Espanyol. El direktor de la Real Academia de la Lengua Española, Darío Villanueva, vino a la konferensia i le kayo las bavas kuando oyo el Judeo-Espanyol, avlado i kantado durante una ora entera. Mi segunda konferensia fue en Sevilla sovre “El Umor Sefaradi” i yene kijyeron ke avle en Judeo-Espanyol! Les konti anekdotas, les kanti kantikas komikas, les ambezi proverbos i dichas komikas ke se ennamoraron. Muestra lingua enkanto a todos!