En este filmo, Jerry Lewis djugo el rolo de un payaso (palyaço) ke se yama Helmut Doork. Doork esta en un kampo de konsantrasion komo prizoniero politiko porke ensulto el Führer una noche ke estava bevido. En el kampo, Doork empeso a azer riir las kreaturas judias ke estan prizonieras en el mizmo kampo para ke se olviden un poko las kondisiones negras del kampo. A los nazis no les plazio esto, i lo embiaron kon las kreaturas a Auschwitz. En Auschwitz, kuando los nazis empesaron a embiar a las kreaturas a la kamara de gaz, Doork se fue kon eyos para ke no se espanten. En la fin del filmo, en la kamara de gaz, las kreaturas se rien, el payaso yora. Esta shena final es la mas triste shena del filmo.
La entision de Jerry Lewis, kuando se desido de filmar este filmo, era muy serioza. Lewis kijo amostrar los orores del Olokosto, i amostrar el lado umano del evento. Lewis estudio el Olokosto en profundidad, antes de aparejar el filmo. Se fue munchas vezes a Auschwitz i a Dachau, i peryo 35 kilos en sesh semanas, para pueder djugar, el rolo de una viktima del kampo de konsantrasion, kon mas muncha presizion.
Lewis demando a su padre su opion sovre el filmo, porke no es muy fasil de azer una komedia sovre un evento seriozo. El artisto paso diez anyos en lavorando enriva del filmo, antes de empesar a filmarlo.
Jerry Lewis mezmo izo un akuerdo kon una guardia vieja de la SS, para asigurarse ke el kampo de konsantrasion seyga reel.
En el anyo 2009, Jerry Lewis aksepto una entrevista de una gazeta, sovre el filmo. Lewis disho ke estava muy orgoyozo del filmo.
Jerry Lewis, se topo kon un ombre, Rolf Greiber, ke en la gerra era enkargado de travar la kuedra de la kamara de gaz, ke iva entosegar los prizonieros. Lewis keriya ke Rolf le konte todo lo ke se paso en la kamara de gaz. Mezmo ke se enforso muncho, Lewis no pudo estar en la mezma kamareta kon Ralf. Ralf disho ke estava muy triste por lo ke aviya echo.
En una entrevista kon la televizion alemana, Jerry Lewis disho, ke el paso krizas de yorar mas de vente vezes durante la produksion del filmo.
Mas duspues, Jerry Lewis penso ke amostrar en los sinemas, una komedia de un evento tan triste, no iva ser djusto por las viktimas i los sovrebivientes. El guadro una kopia del filmo en una kasha, ke dingunos no ivan a pueder avrir. En el anyo 2015, Lewis permetio ke este filmo seyga guadrado kon unos kuantos otros de sus filmos en la Biblioteka del Kongreso, i ke seyga amostrado en los sinemas en el anyo 2025.
