AAAZINU

Eskuchad los syelos, las palavras ke esto avlando, i oyid las dichas de mi boka. Ansi enpesa la Perasha de Aazinu, kon las palavras de Moshe Rabenu. Ansi Moshe Rabenu se aderesa a las syelos ke el estava serka de los syelos. Por razon ke ya se aserko los ultimos diyas de su vida. Un poko mas el ya se iva apartar de este mundo materyel, i se iva ir a el mundo vinedero. Por esta kavza enpeso, i se adereso a los syelos i despues se adereso a la tyera. El tomo por testigos a los syelos i la tyerra. Si el puevlo djudyo non va sintir las palavras de el Kriyador no va andar es sus kaminos, los syelos i la tyerra van a dar testimonyo por sus no buena kondukta. I el eskapo ke Moshe Rabenu tomo por testigos para testimonyar la kondukta del puevlo djudyo a los syelos i a la tyerra por ke son firme todo tyempo ke el mundo egziste. En kavzo ke el puevlo djudyo no va estar korrekto kon el Kriyador i kon su ley santa, estonses los syelos no van a dar las luvyas i las tyerras, no van a dar sus produktos. Komo lo meldamos en la sena, no va ver luvyas i la tyerra no vo dar produkto. Nuestros savyos dan tambien otra razon sovre este sujeto. Kijo dizir Moshe Rabenu, mirad a los syelos i a la tyerra si eyos salen del orden del patron de el mundo. Los syelos syempre dan las luvyas i la tyerra su produkto i no trokan des sus naturas.

El mundo se sostyene por el merito de la ley, i de el sirvisyo a el Kriyador i sovre la bienfezesya. Si somos korrektos en estos pilares sakros, egziste en el mundo pas i trankilidad. Bivimos sin espanto vida repozada. La luz de los syelos es la Tora. Por el merito de la Tora, egziste en el mundo el repozo. David Ameleh en el livro de Teilim dize: El Kriyador nuestro sinyor, ke fuerte es tu nombre sovre el mundo. Tu das la ermozura a los syelos. Ansi de da tu ezmuzura a la djente. I da de tu luz a los enbezantes de tu ley santa. Por la boka de los chikitos i mamantes enforteses los simyentos de el mundo. David Ameleh kijo dizir la Tora ke se enbezan los chikos i se syente de sus bokas se sostyene el mundo. El Kriyador ke nos de la fuersa i la enerjiya de azer Teshuva komplidad a este Shabat ke es Shabat Teshuva, el Kriyador nos membre a nozotros i nos de vidas largas kon salud buena.

Gemar Hatima Tova. 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın