Muy Keridos Korelijionarios,
Ya estamos al punto de fiestar las “fiestas de Tishri” ke es muy emportante para mozotros dunke non aderesamos a El Todo Poderozo en bendizyendo:
“Baruh Sheehiyanu Vekiyemanu Veigianu Lazeman Aze”
i lo agredesamos todo en rogandole komo kada anyo ke la aynada vinyente seya una anyada de bendisyon komo para nozotros i komo para todo el mundo.
“Tahel Shana Uvirhotea /Empese la Anyada i su Fekundidad”
No ay menester de repetar ke el periodo ke empesa kon “Rosh Hashana” i alkansa asta “Yom Kipur” es una oportunidad de profitar para aserkarnos a los preseptos de la Tora i de tornar en “Teshuva”. En realidad es de el prensipyo de este mez ke estamos orasyonando en “Selihot” para alkansar a la mizerikordiya de El Todo Poderozo i ganar su tolerensia.
“Ayom Arat Olam Ayom Yaamid Bamishpat”“Es diya ke se Krio El Universo, Es diya de Estar en Djuzgo”
Keridos Ermanos,
Ya es bien savido ke devemos sovreguadrar nuestras valores de relijion i las valores kulturalas ke son los elementos prinsipales de nuestra egzistensia i ke forman nuestra unidad i entegridad.
“Ki i Hohmathem Uvinathem Leene Aamim.”
“Ke Esta Es vuestra saviduriya i Entelijensia en Ojos de Puevlos”
Es por esto ke devemos enkulkar nuestra relijion i kultura a nuestros ninyos empesando dentro la famiya i kontinuar a transmeterla en nuestra eskola ke a la verdad dizir nuestra eskola sige una linya muy progresiva en kampo de enstruksion i edukasion. Esto es muy emportante.
Keridos Korelijionarios,
Tomando en konsiderasion ke nos estamos amenguando komo populasion i semos una kolektividad aedada si se puede dizir, tiene una grande emportansa de pueder rijir nuestras asosyasiones muy rasionalmente i konforme a las kondisiones aktuales.
Siendo ke nuestro prezidente i los dirijentes de nuestra komunidad estan en este esfuerso kon muncha abnegasion, devemos de darles nuestro apoyo absoluto. Vos envito de adjuntarvos kon mi en este apoyo.
“Vekulam Yitbarehu Mimaon Aberahot”
“Todos Sean bendichos del Manadero da le Bensisyon”
Keridos Ermanos,
En estos diyas ke estamos a la entrada del 5788en anyo de nuestro kalendaryo, esto rogando a El Todo Poderozo ke seya una aynada de pas, sanedad i prosperidad para nuestra komunidad i para todo el mundo i vos esto yamando a adjuntarvos kon mi en esta rogativa.
Siendo yeno de estos sentimientos i pensamientos vos auguro una aynada buena i yena de pas, sanedad i prosperidad kon vuestras famiyas i vuestros keridos todo en bendizyendovos kon todas las bendisyones de nuestra Santa Tora.
“Leshana Tova Tihatevu”
“Tizku Leshanim Rabot”
Rav Isak HALEVA
Gran Rabino
