Ultimo mensaje de Haim Vitali Sadacca

Klara PERAHYA Judeo-Espanyol
6 Eylül 2017 Çarşamba

Debasho el titolo “Agradesimiento de un Ombre Aedado”, muestro (resyentemente defundo) kolavorador ‘Haim Vitali Sadacca’ mos avia mandado el mes pasado su ultimo mensaje en djudeo-espanyol, para ser publikado en la revista mensual “El Amaneser” datada del 2 Agosto 2017.

Vo lo transmeto en su integralidad, kon las mizmas palavras i la mizma ortografia afin ke los ke no tuvyeron la oportunidad de meldarlo entonses puedan azerlo oy, despues su desaparisyon en la muerte:

“Yo kon mi korason te bendigo mi kerida “Vida”. Mis pasos eran legales, mi egzistensya meresida. Nunka estuve ambisyozo; siempre kon mi gozo pasi una vida modesta, sin ningun desrepozo.

  Me dates alegrias i me aleshates de selos; ni de angustias hui tokado, ni de ansyas o dezeos… Agora ke esto serka de la fin de mi kamino, apresyi tu regalo kreandome un buen destino.

  Serka de mis anyos finales, yo te bendigo “Vida”, kreo ke mi famiya te rengrasya i no se olvida. Si vites en mis ojos humedad de yoro ke briya es de las indjustisyas del mundo ke mi alma viya”. Haim Vitali Sedaka.  

  Vitali Haim Sadacca amava la vida, el tambyen amava i dezeava la supervivyensa de la relijyon de la kuala el era orijinaryo. Ansi, el era un grande luchador afin ke no muera por syempre en el olvido o la indiferensya, la lingua vernakular de muestros avuelos ke bivyeron durante nombrozos siglos sovre tyerras ajenas, kaji syempre sometidos a Autoridades ajenas.

  Ma komo es syempre el kavzo para la totalidad de los umanos, el tambyen (el momento venido) serro sus ojos a la vida i a su inmensa valor aun las desgrasyas ke oy en dia son por ansi dizir kotidyanas i kruelas.

   La muerte es una fatalidad ke ningun ser umano pudo asta oy, ni puedra probablemente nunka, venser. Presto o tadre, eya mos aspera en un kanton de kaleja o en un lecho de ospital, guardyana invensivle de la ultima limite de egzistensya ke mos fue akordada.

  Eya, la mas parte del tyempo, es kaprichoza o syega, i tambyen (komo munchas vezes es el kavzo) indjusta i kruela. En todo kavzo, kuala ke sea la razon, eya es syempre inevitavle.

  Esta ves, eya eskojo un ombre aedado… Si, fizikamente Haim Vitali Sadaka era un ombre de edad avansada ma de esprito klaro, yeno de vitalidad i puede ser de muevas verdades a komunikar i transmetermos.

    En los tekstos ke el embiava kaji regolarmente a la revista mensual “El Amaneser”, se topava munchas vezes refleksyones o parselas de refleksyones de grande valor.

  Es una realidad ke devemos akseptar, la verdadera sagasidad no se topa unikamente en los livros antiguos, enunsyada segun el konteksto sosyo-kultural de akeyos tyempos, ma tambyen en el konteksto sosyal ande mos topamos oy en dia.

  En el teshido de la antigua sagasidad de nombrozos pasajes de la Biblia i la vizyon aktual del mundo prezente, Haim Vitali Sadacca, kon muncho meoyo, eskojo el ekilibrio (lo ke los fransezes yaman ‘Le juste milieu’ (el djusto medyo).

  En sus chikos tekstos poetikos inspirados por la mas parte grasyas a su propya vizyon de la vida, se topan esparsidos ‘granos de meditasyon filozofika’ ke otomatikamente mos pushan a refleshir personalmente sovre la importansa i en mizmo tyempo la frajilidad de la Umanidad.

  Ke su alma repoze en paz en Ganeden. Amen!

   Muestras sinseras kondoleansas a su mujer, dama muy novle i muy dulse de karakter, ansi ke a sus dos ijos i ermueras, sin olvidarmos de sus dos inyetas i doz inyetos de grande valor. Mazal bueno ke tengan!

I para kloturar: Ay de esto unos kuantos mezes, Vitali Haim Sadacca tuvo la alegria de ver sus dos inyetas byen kazadas i alegres.

   Ke syempre sea yeno de felisidad el futuro de la totalidad de su famiya!