Si, dos faktos sin ninguna relasyon entre eyos se pasaron en el koryente de la semana pasada i dezeo avlarvos a sus sujeto, por seguro de una manera mas o menos superfisyal por kavza de mankura de lugar en muestra pajina djudeo-Espanyola.
1) Revolta relijyoza Musulmana kontra el terrorizmo:
Grasyas a la alta kualidad moral i al esprito de organizasyon del İmam Hassen Chalghoumi presedente Imam de Drancy serka de Paris komo tambyen a la kolaborasyon de Marek Halter, kaji trenta dirijentes relijyozos Musulmanos de “Fransya, Almanya i Tunizia” realmente fideles a la alta etika umanista ke Dyo reklama de kada ‘kriansa pensante’, fueron a Toulouse para orasyonar por la alma de las viktimas ke eran por la mas parte de muy chika edad tal Myriam, ija del direktor del establesimyento eskolaryo “Ohr Thora”, ninyos ke fueron asasinados sin remorso ni piadad, en el anyo 2012 por el djihadisto Mohamed Merah.
Los Relijyozos Musulmanos enkontraron de mezmo los reprezentantes de la Komunidad djudia de Toulouse i orasyonaron en la guerta de la eskola, delantre una eskulptura komemorativa sovre la kuala era espandida una banderola ke dizia en Arabo, Alman, Franses i Inglez: “Marsha de Muzulmanos kontra el terrorizmo”.
A sus retorno en Paris eyos fueron de mezmo vijitar i orasyonar en el chiko’Merkado ultra kosher’ de Vincennes ansi ke en el Bataklan, los kualos (todos los dos) avian sido tambyen objektos de terrivles asaltos terroristos.
Marek Halter deklaro a este sujeto: “Kreyo muncho a estos djestos simbolikos; un ombre da la mano a un otro ombre i sus relasyones kaji immedyatamente trokan”.
De su parte Mohamed Taha Sabri, imam de Berlin deklaro en Alman: “En este momento estamos aki en muestra kualidad de muzulmanos, afin de afirmar ke munchas kozas (negativas) ke fueron echas al nombre de muestra relijyon no son su verdadera kara”.
I el Imam Hassen Chalgoumi afirmo “En kada lugar ande mos topamos ay komunidades djudias, muzulmanas, kristyanas, esto es un simbolo, la koza la mas importante es de ser endjuntos”.
2) Vijita de Binyamin Natanyahu en Fransya:
Sovre la invitasyon personal de Emmanuel Macron, a la komemorasyon del muy triste akontesimyento kriminal en Fransya en el anyo 1942 (nombrado “Vel d’Hiv”) durante el kual ‘polisyeros fransezes’ se avian apresurado kaji kon grande entusyazmo de arrestar lo mas posivle de muestros ermanos i puede ser mizmo mas de lo ke reklamava la Almanya. Benyamin Netanyahu, aun muy preokupado por los problemas internos de su payis, aksepto immedyatamente i sin la mas chika ezitasyon de renderse en la kapitala Franseza.
Este primer kontakto entre los dos ‘Ombres de Estado’ sera probablemente de un grande provecho para la politika i la estabilidad Israelyana.
Antes de todo, Emmanuel Macron aseguro Binyamin Netanyahu de su vijilansya sovre el desvelopamyento del programa nuklear Iranyano.
El Prezidente Franses konsejo de mezmo kon insistensya un retorno a muevas negosiasyones entre Israel i la Palestina kon el solo objetivo de ayegar a una solusyon akseptavle del problema grasyas a un vezindado pasifiko i amigavle.
Komo lo es para munchos de entre mozotros, para Emmanuel Macron tambyen, la mijor solusyon sera 2 Estados vezinos ke no seran dependentes el uno del otro ma simplemente se ayudaran resiprokamente.
En todo kavzo, al pareser, Benyamin Netanyahu retorno muy kontente a su payis kon puede ser una mueva vizyon de la realidad i muevos proyektos a realizar.
