Konsyertos en muestras Sinagogas

 Dospues de una semana ke eskrivi dos artikolos el primer para el Amaneser i el segundo para el Şalom, esta semana no tenia gana para eskrivir. Ma ya se ke devo de akumplir mi dover en eskrivyendo mi artikolo. Normalmente esto eskrivyendo mis artikolos lunes a la tadre i de vez en kuando si no tengo gana, diya de martes en el echo entre shishes i empushes. De una vanda me demandan de sinyar (imzalamak) siertos dokumentos, de la otra vanda me demandan siertos presyos i komo me karisheo a todo lo ke se aze en muestra fabrika mizmo si no me demandan yo esto demandando lo ke estan azyendo.

  Este martes me fui kon siertos responsavles del IKSV (Fondasyon de arte i de kultura d’Estanbol - İstanbul Kültür ve Sanat Vakfı) kon muestro amigo Robert Schild ke se enteresa en todo modo de aktividades kulturales, muzikales - klasika, tradisyonal - i teatral i ke tyene buenas relasyones kon todo modo de personas ke se enteresan en estos kampos para topar lugares para el Festival de Muzika Klasika ke se va realizar dyez mezes dospues. Vos avia kontado el program de “Los Kaminos de la Muzika – Müzik Rotaları” ke se realizo en Yeniköy este anyo. I empesimos a amostrar el Neve Şalom kon el Sentro Kultural ke se topa debasho de la Keila; el Kal de los Frankos - o de los Italyanos ke es una sinagoga no muy grande ma simpatika. Era la primera vez ke estavan vijitando esta sinagoga. Todos los ke pasan por el Yüksekkaldırım konosen de afuera el Kal de los Ashkenazes ma kuando entrash reelmente es una maraviya. Estos konsyertos dan la posibilidad de azer konoser estos sitos istorikos en sintiendo un konserto de muzika klasika.

 Este viaje en Galata no se aze solo kon sinagogas. Vijitimos la Iglesia de los Otrishianos (Avusturyalı) ke son Latines Katolikos – reelmente no lo savia- ke se topa en una partida de la skola Otrishiana. Es un edifisio ke fue fraguado ochosyentos anyos antes ma restorado kompletamente en el venten siglo. I dospues vijitimos una otra iglesia katolika Santo Paul i Santo Pierre (Saint Pierre et Saint Paul) una eglisia chika ande ay sitios para dosyentas personas ma kon un akustik maraviyozo i mos disheron ke es un lugar maraviyozo para los grupos korales (koro).

 En vijitando todos estos lugares no kideyaron al Neve Şalom para ser una parte de un diya i disheron ke este lugar se deve de ser uzado para un konsyerto emportante kon sus sheshentos sityos (oturma yeri). I reelmente fui muy kontente de oyir esto.

 Subito les demandi si keriyan vijitar el Zülfaris ke era la sinagoga la mas uzada antes de los mil i novesyentos i sesenta i ke fue usada komo muzeo de muestra komunidad mas de kinze anyos. Kijeron vijitar i reelmente las dos dammas ke son responsavles de topar lugares para los evenimientos de los festivales fueron empresyonadas kon el Templo Zulfaris. Reelmente es un lugar ke me plaze muncho i keria ke estas dammas konoskan este lugar; ke puede ser un lugar emportante para ekspozisyones i siertos konsyertos.

 Sin olvidar, vijitimos mizmo el Orno de Matsa anda dainda se puede azer siertas aktividades artistikas. I lo vieron. Malorozamente muestra komunidad no es rika de punto de vista de apartamentos i hanes. Ma tenemos siertos lugares ke reelmente se pueden emplear para konsiertos o para ekspozisyones artistikas.

 Espero ke dies mezes despues vamos a segir siertos konsiertos en muestras sinagogas.

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın