Es evidente ke en este momento no son raros los faktos sovre los kualos se puede eskrivir; nombrozos son los payizes ande se pasa kavzos por la mas parte trajikos ke tyenen envezes el poder de trokar la manera de pensar de una partida del mundo.
De muevo semos ovligados de revenir a los mizmos sujetos i de repetir (komo un eternal leitmotivo) el relato de aktos kriminales la mas parte del tyempo sin kualkyer preteksto admisivle, no solo en lugares ande el nivel kultural es primitivo ma tambyen en kual otro espasyo terrestre ke sea.
Ke sean djudyos, kristyanos o muzulmanos, orijinaryos de la Azia o de la Afrika, komo tambyen de la Evropa o de la Amerika del Norte, vemos munchas vezes individuos empapados de kreensas relijyozas o de sentimyentos ultranasyonalistos, personas al pareser pushadas por un dezeo de asumir la absoluta integralidad de la erensya deshada de parte de leshanos avuelos, erensya por la mas parte empapada de rankor, a la kuala kada individuo se esforsa de kedar atado en su manera de pensar i de djuzgar en praktikando kaji la mezma obedyensa syega a simples preseptos arkaikos ke repozan sovre prinsipyos ke en el pasado eran puede ser muy pertinentes ma ke oy son inadekuados a la atmosfera sosyal en la kuala mos topamos.
Ansi oy kero revenir sovre este sujeto despues de aver meldado en la prensa franseza una informasyon ke me sorprendyo terrivlemente i ke vos transmeto debasho estas linyas en su versyon otentika en fransez, todo en esforsandome de darvos tambyen su traduksyon en djudeo-espanyol.
Teksto orijinal en lingua franseza: “Abject et inhumain, des membres de groupes européens identitaires d’extrême droite “ont collecté plus de 50.000 euros en moins de trois semaines pour mener des “opérations de sabotage” d’un sauvetage de migrants en Méditerranée...
“C’est le mouvement français raciste et xénophobe “Génération identitaire” qui a lancé l’idée sur internet via un site et une campagne promettant de “défendre l’Europe”. (Des paroles qu’il ne faut pas prendre à la légère venant de ceux qui ont déjà tenté de bloquer le départ du navire L’Aquarius, le bateau de l’ O.N.G. “Sos Méditerranée”, alors qu’il s’apprêtait à partir pour une mission de “sauvetage humanitaire en Sicile” D’autres actions de ce genre sont en effet prévues pour cet été.
“Rappelons que grâce à l’aide humanitaire, 6.000 personnes ont pu être sauvées de la “noyade” rien que cette année. (fin de citation)”
Traduksyon aproksimativa en Judeo Espanyol: (Abjektos i inumanos, myembros de los grupos Evropeos identitaryos de la ‘Ekstrema Derecha’ rekojeron mas de 50.000 Euros en manko de tres semanas para egzekutir operasyones de sabotaje de kualkyer salvamyento de migrantes en la mar Mediteranea.
Es el movimyento franses rasisto i zenofobo nombrado “Jenerasyon Identitarya” ke dyo la idea de una intervensyon afin de impedir kualkyer ayudo a embarkasyones yenas de migrantes ke se topan en riziko de undirsen, i esto afin de “defender la Pureza Evropea”.
Palavras ke no kale analizar superfisyalmente, pronunsyadas por los ke ya se avian esforsado de blokar la partensya de la embarkasyon nombrada “L’Aquarium” i syertas otras naves semejantes ke se aparejavan a salir a kamino para egzekutir una misyon de salvamyento umanitaryo. – fin de traduksyon”.
Es triste, muy triste, ke oy en dia, en el payis ke fue el primer a rekonoser los djudyos komo verdaderos sitizanos fransezes i ande en el venten siglo dospues de la segunda gerra mundyal fue sinyada la “Deklarasyon de los Derechos del Ombre”, semejantes grupos ultra nasyonalistos puedan kerer impedir la supervivensya de desmazalados destinados a undirsen en las aguas amargas de la Mediteranea.
