Komo la Prensa mundyal kaji en su totalidad lo deklaro “Shabat pasado el 20 del mes koryente” Donald Trump, akompanyado de munchos de sus prinsipales kolavoradores i partikolarmente de sus ija i yerno, izo el primer viaje ritual ke uzualmente todos los Muevos Prezidentes azen en eskojendo la mas parte del tyempo, payizes kon los kualos las relasyones diplomatikas prezentan lo mas posivle de avantajes para sus propyo governo.
Es la razon por la kuala, despues de profundas refleksyones, el Prezidente Amerikano i sus konsejeros eskojeron los “Payizes del Oriente Medyo” ke en este momento konstituen: a) ‘el sujeto el mas avantajozo del punto de vista ekonomiko kon la vendida de armas ansi ke otros produktos similaryos’, i de otra vanda, b)‘el problema el mas nevraljiko kon sus varyas difikultades al pareser ineluktavles’.
Ansi fue desidido de salir a viaje dia de Shabat el 20 del mez koryente afin de toparsen Alhad en “Riyad”, kapitala de la Arabia Saudita i Lunes en Israel i la Palestina.
Kavzo muy raro o puede ser mizmo eksepsyonal, la ija de Donald Trump, Ivanka i su marido, Jared Kushner, todos los dos ‘profundos ortodoksos djudyos’ resivyeron la otorizasyon Rabinika de viajar kon el Prezidente durante la oras sakras de Shabat, lo ke mos da una idea de la importansa de sus prezensya durante este viaje prezidensyal.
Es una realidad: las leyes relijyozas djudias no permeten de viajar Shabat a la eksepsyon de situasyones en las kualas una vida se topa en reziko de muerte komo por egzempyo, medikos djudyos o ekipos medikales ke tyenen el derecho de konduzir un karo para ir a la kavesera de una persona gravemente hazina/enferma, o byen soldados ke deven syempre kontinuar sus lavoro afin de garantizar la seguridad de sus payis.
El prezidente de los Estados Unidos avia djustamente konfiado a su yerno ‘Jared Kushner’ la misyon de negosyar un akordo de paz entre Israel i los palestinyanos. El le disho “Si tu no parvyenes a realizar la Paz en el Oriente Medyo, dubyo ke otra persona lo puedra”.
La primera partida de este viaje fue una real reushita al profito de la Amerika del Norte komo tambyen de syertos Governos Aziatikos. La Arabia Saudita avia kombidado los kapos de todos los payizes vezinos i otros ‘syempre de konfesyon Sunit’ kon los kualos Donald Trump i sus kolavoradores entraron en kontakto para diskutir el reziko ke “el Iran kon su bomba atomika” i “el El DAES kon su djihadizmo infernal” konstituen para el mundo entero.
Esta vijita del prezidente Amerikano konstituo partikularmente un real sukseso para la dinastia de la Arabia Saudita la kuala vido su imajen realsado en los payizes del entorno, sukseso ke intensifika ainda mas las relasyones komersyales entre las dos potensyas.
La segunda partida del viyaje fue i es ainda en este momento la mas problematika i ansi la mas difisil a egzekutir. Se trata de estableser entre dos puevlos antagonistos una situasyon de paz i mizmo de ayudo resiproko.
Por la primera vez, un Prezidente Amerikano se enkorvo delantre el “Kotel Maravi” ke es konsiderado komo el lugar el mas sakro de Israel.
Es ke Jared Kushner puedra konvenser el aktual governo Israelyano de renunsyar al dezeo de un ‘Grande Israel’? Es ke dos puevlos diferentes en sus konseptos i ideas, kada uno enfohado en su propya vizyon de la vida, pueden (mesklados el uno al otro) bivir en paz?
