Bear-Behukotay

 Iavlo El Kriyador a Moshe en el monte de Sinay dizyendo: “Avla a los ijos de Israel i diles, kuando vendresh a la tyerra ke yo vos dare, olgara la tyerra Shabat a el Todo Poderoso. Sesh anyos sembraras tu kampo i sesh anyos apodaras tu vinya i akojeras tu renuevo. En el anyo seten avra Shabat de olgansa a la tyerra, Shabat a El Kriyador. Tu sembres tu kampo i apodes tu vinya. El Shabat de la tyerra vosh sera para komer, a ti, i a tu syervo i a tu syerva i a tu kuatropea, i a la bestya ke uvyere en tu tyerra”.

El eskopo de todas las enkomendansas es de azermos akodrar, ke somos ovligados de ovedeser i afirmar las dichas de El Kriyador.

En ovedesyendo la persona las enkomendansas de El Kriyador, para myentes, ke el Santo bendicho el podesta sovre el mundo entero, el ombre deve de saver ke el patron de este mundo es El Kriyador de el mundo. En la bondansa no devemos de olvidarmos la bondansa de onde nos vino. En afirmando las fueras i los djuisyos, damos loores a El Kriyador ke nos rengrasyo kon muncho bueno.

Kuando el sinyor de el mundo nos da un kampo, devemos de ararlo i sembrarlo komo esta dicho en la Tora. En arekojando el produkto de la tyerra devemos de deshar los bodres de el kampo para los menesterozos, no deve de tornar a tomarlo. No deve de olvidarse de aregalar a el Koen, a el Levi para ke tenga la bendisyon del Dyo. 

La perasha nos enbeza todo lo ke es de menester de azer, para ke tengamos el merito de alkansar la bendisyon de El Kriyador bendicho su nombre.

BEHUKOTAY

 “Si anduvyeresh en mis fueros, i guadraresh mis enkomendansas, i las azeresh, yo dare vuestra luvya en su tyempo, i la tyerra dara su ermoyo, i el arvol del kampo dara su fruto. I komeresh vuestro pan a la artura, i moraresh siguros en vuestra tyerra. I dare paz en la tyerra. I dormiresh, i no ara ken vos espante. I are kitar las alimanyos malas de la tyerra, i por vuestra tyerra no pasara espada. Vos muchiguare, i afirmare mi firmamyento a vozotros i andare entre vozotros. I sere vuestro Dyo. I seresh mi puevlo. Yo so vuestro Kriyador”.

La Tora nos esta enkomendando de aplikar las enkomendansas ke nos enkomendo El Kriyador. El Kriyador nos esta prometyendo ke nos va dar nuestro mantenimyento syempre. ‘Si anduvyeres en mis fueros’, son los primeros biervos de nuestra perasha. Kere dizir, si vash a ser buenos i onestos i vos vash a enforteser en el estudyo de la ley, vos va dar syempre luvyas de bendisyon. Tambien va pozar la pas entre vozotros. Ke no digash ya tenemos un pan de komer i muncho bueno pero la pas i el repozo nos manka. Por esta kavza vos esto prometyendo ke yo vos vo dar i la paz para ke tengash el repozo. Yo vo estar syempre entre vozotros. No solamente en este mundo nos va dar artura i repozo por ke estudyamos la ley santa, i la aplikaremos. Ansi ke tendramos merito de eradar el mundo vinidero.

“A mis enkomendansas guadraresh”. Este verseto nos embeza dizyendo la ardor ke devemos de tener para aplikar las enkomendansas dizyendo kuando me se va fadar de azer tala enkomendansa.

Devemos de ser prontos en las enkomendansas i kuando va vinir el tyempo de azerlos si ninguna ezitasyon aplikarlas.

“Ansi vos vo a dar las luvyas en su tyempo, vash a tener syempre las bendisyones. El Kriyador va pozar mi morada entre vozotros. Yo vo morar entre vozotros por el merito ke estash enfortesyendo la ley i afirmando mis enkomendansas” dize El Todo Poderozo.

 

 

 

 

 

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın