La Sinagoga de Edirne ke se esta akseptando komo la tresera grande sinagoga de la Evropa esta dando servisyo desde Novembre 2015 fina oy, kon aktivitades diferentes komo: konseres, ekspozisyones i otras…
Los dirijentes de la komunidad djudiya de la Turkiya desidaron de envitar a David D’eor por la kavza de selebrar la “Semana de las Fondasyones” (Vakıflar Haftası) i para partisipar (katkıda bulunmak) a la vida kultural de Edirne.
David D’eor, su nombre sinyifika la boz de la luz, del paradiso. El famozo kontretenor David D’eor es konosido komo uno de los mas buenos kantadores de vokal (vokal şarkıcı) del mundo.
Kantador, kompozitor i eskritor de kantes tyene una boz mirakuloza de mas de kuatro oktaves.
El nasyo en 1965 en Holon, estudyo en la ‘Akademiya de Muzika de Yerushalayim’, tyene 10 albumes de oro i de platin kon un stil a el propyo ke entegra kon armoniya los elementos de la muzika djudiya i del mundo klasiko en sus albumes.
Su talento (yetenek) lo yevo a dar konsertos delantre de munchos dirijentes del mundo, komo el Papa Jean-Paul, los presidentes amerikanos Bill Clinton i Barack Obama, el rey de Thailand, la primera ministra alemana Angela Merkel i otros famozos.
En el tyempo de Shimon Perez el dyo konserto en el “Kremlin” i reprezento Israel en la Eurovision del anyo 2004 kon la kantika “Leha’amin”.
Su repertuar klasiko le dyo la posibilidad de kantar kon munchas i grandes orkestras filarmonikas i senfonikas komo las orkestras filarmonikas de Moskova, Pekin, Shangay, Belgrad, Viyana i otras…
David D’eor resivyo la medalya de shovalye de los “Artes i de la Literatura” de la parte del governo italyano en 2010, i en 2013 lo rekompansaron en la China por el duo ke izo kon la artista Ha Hui, una reushidad primera por David D’eor komo ajeno en este pais.
El ama la muzika de aryento su korason i pensa ke la muzika parvyene a kontaktar a todos los korasones. El kere byen el mundo, las personas, i malgrado las diferensyas ke tenemos, dize ke semos responsavles los unos de los otros.
En una interviu kon “Israpresse”, avlo lo ke syente por la muzika.
“Por mi kantar delantre de los prezidentes del mundo, u delantre de un puevlo me da la mizma eksitasyon.
Mi padre (ke este en gan-eden) me ambezo a mirar a todas las personas del mizmo punto de vista, mizmo si son de niveles (seviye) diferentes.”
David D’eor es el bisinyeto del gran rabino de la Libya. Sus sentimyentos de ser djudyo son: “Mi kreensya en Dio me akompanya desde mi nasimyento. Ande mozotros, el dia de Shabat fue syempre el dia el mas emportante i preferado de la semana.”
“Mizmo kuando eramos mansevos i keriyamos salir, el dia sakro de vyernes la noche i shabat estavamos en el doredor de una meza.
El avenir me esta preokupando muncho. Tengo dos kriyaturas i dezeo, kero ke bivan en un mundo mijor.
El mundo esta avansado en munchos puntos de vista ma; esto remarkando ke mos atrazimos en munchos otros espasyos.”
El ampeso su karyera en el teatro nasyonal de Israel i el primer albüm ke kito en 1991, salyo a la shena kon Zubin Mehta i su orkestra en Carmina Burana.
David D’eor, en el anyo 2016, en los funerales de Shimon Peres, meldo la orasyon enfluente (etkileyici) “Avinu Malkenu” delantre de 5.000 personas ande se topava Barack Obama, el Prens Charles i munchos prezidentes del mundo entero. Era nesesaryo del testamento de Peres.
Su talento no es solamente en la muzika, D’eor en 2016 avyo su primera ekspozisyon de pintura en Israel. Esta organizasyon perfekta de 14 de Mayo de 500 personas se realizo en la prezidensya de Silvyo Ovadya ke lavoro dia i noche sin tomar reflo.
Silvyo tyene una ekipa de volontaryos para pueder realizar estos evenementos en la sinagoga de Edirne.
A las sesh los envitados ampesaron a vinir kon los otobuses. En la guerta del kal se metyo mezas ande se estava asando köftes, sudjuk i ligados. Todos en el rango asperando su torno. En la otra parte bevyendas, todo muy abondante i savrozo. El konserto ampeso despues de la vinida del ayudante del primer ministro (başbakan yardımcısı) Veysi Kaynak, el deputado de Estambol Şafak Pavey, el governador (vali) de Edirne, Günay Özdemir, el direktör jeneral de la fondasyon (vakıflar genel müdürü) Adnan Ertem, el Konsul Israelyano de Estambol, Shai Cohen i el Prof. Ilber Ortaylı.
El prezidente de muestra komunitad Ishak Ibrahimzadeh los resivyo en la puerta i entraron endjuntos al kal majestuozo.
Moris Levi, ke es el braso derecho del presidente Ishak Ibrahimzadeh, izo una avla kurta i envito a Veysi Kaynak ke avlo senseramente de las relasyones de los djudyos i muzulmanos…
Siguramente ke esta organizasyon se realizo kon el grande apoyo (destek) de Ishak Ibrahimzadeh, Jojo Nasi, Moris Levi i Deniz Saporta.
Todos muy kontentes de la boz i las kantikas de David D’eor, tornaron a sus kazas en murmureando (mırıldanmak) la muzika fantastika.
Keridos Lektores, kero remersyar a los prezidentes de esta nochada reushida Silvyo Ovadya, Ishak Ibrahimzadeh i sus ekipas ke mos izyeron bivir esta nochada mirakuloza en esta sinagoga fantastika...
