Ke pensamos sovre la Politika Evropea

Estos dos anyos teniyamos un alay de referandum i de eleksyones en muestro pais i en la Evropa. Malorozamente los evenimientos teroristikos i las gerras ke estamos bivyendo en muestra rejion komo la Siria i el Irak estan determinando los rezultados de estas eleksyones. Las personas ke biven en la Evropa no keren ver mas imigrantes porke si no reushen en la vida son un grande potansiel para ser bandidos o teroristos. Esto no era la mizma koza en los anyos 30, 40 o 50. En estas epokas vimos ke munchos imigrantes kontribuaron a la vida intelektual de los paizes ande se topavan. Unos kuantos anyos antes tuve la posibilidad de segir un dokumentaryo sovre los imigrantes klandestinos ke vinyeron a Fransia i reelmente la mas grande partida ke eran Djudios de la Afrika del norte izieron ganar muncho a la vida intelektual de la Fransia. Eyos eran eskrivanos, kompozitores, poetas ke eskriviyan palavras para las kantikas i munchos otros kapaches en diferentes kampos. Reelmente estos imigrantes fueron una ganansya para los payizes ke imigraron mizmo si eran klandestinos (yasa dışı).

 En los anyos 1960, la Almanya teniya menester de lavorantes. Tenia una grande ekonomia i una endustria muy emportante no teniendo bastante de lavorantes. I desidyeron de tomar personas de la Turkiya. I estas personas ke los yamavamos “Alamandji” (los ke son de la Alemanya) veniyan kada enverano kon las arabas ke no puediyamos topar en Turkiya i radyos kon tranzistores ke era koza muevo en esta epoka. Una grande parte de estos turkos no reusheron a asimilarsen i preferaron ir a las kavanes (kafe a la turka) ande se topa solo los turkos; preferaron de segir los maches de futbol de la Turkiya o de los ekipos turkos en estos kafes solo kon los turkos. Una grande partida no reusheron a avlar la lingua del pais. Es la segunda i la tresera jenerasyon ke son mas asimilados a los Almanes. Avlan muy bueno la lingua Almana i si eskaparon la universidad en un sierto kampo tienen todas las posibilidades para lavorar. Para las personas ke keren ser parte del puevlo no ay dinguna difikultad - mizmo si tienen nombres turkos tienen la posibilidad para ser elijidos en las munisipalidades o en la asamblea nasyonal. Savemos ke el prezidente del partido de los Vedres (Yeşiller Partisi) es un orijinaryo de la Turkiya ma es mas muncho Aleman ke Turko. Oy en diya vemos munchos avokatos ke reusheron en sus ofisios. Ma de la otra parte puedesh ver en todas las sivdades serka de la estasyon santral de treno un alay de serseris i una grande partida son mansevos turkos. Malorozamente son mansevos ke no meldaron i ke no reusheron. En la Almanya son Turkos. Si vienen a la Turkiya komo no konosen bastante el Turko (son la tresera jenerasyon en este payis) i no pueden ser adaptados los yaman “Alamandji”. Son komo los Djudios Turkanos. En Turkiya son Djudios i si se van a Israel son nomados esta vez “Turkos”. Ke no vos pareska ke es solo para los Djudios. Kuando era mansevo i los enveranos moravan en Tarabya tenian munchos amigos gregos i eran Turkos solo en Gresya.

Oy en diya el problem es diferente i la mas grande partida de los imigrantes ke keren imigrar a los payizes Evropeos son muzulmanos ke vienen de payizes muy proves o ke estan en gerra. Si son relijiozos no se pueden asimilar al payis. Ya se komo djudio ke no es bueno la asimilasyon. Ma no es ni bueno de kedar komo azete ensima de la agua sin pueder ser una parte del puevlo. En Alemanya, en Koln-Cologne, ay una grande kaye ande todas las botikas i restoranes tienen nombres turkos. En kada botika esta eskrito en Turko. Vos parese ke es el Brooklyn de New York.

Dospues del referandum komo las relasyones estan limoni kon la Evropa siertos ministros estan menasando la Evropa: si no alevantan las vizas para los turkos van a deshar en la mar Ege todos los ke keren fuyirsen. I este modo se van a vengarsen. De vez en kuando dizen ke es la fin de la Evropa ma dinguna persona no se kere fuir a la Arabia Saudit, a los paizes de mayoriya musulmana mizmo a un payis ke se acheta dainda komo un pais laiko.

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın