Seder en White House sin la asistiensia del Prezidente Trump

Lunes demanyana, el portaboz (sözcü) de White House (la Kaza Blanka), Natalie Strom, disho ‘El Seder en White House va ser una oportunidad por el personel obzervante de White House, espesialamente por los ke no van a pueder estar kon sus famiyas. Ansi, van a pueder selebrar la fiesta kon sus kolegas. El personel judio i non-judio van a pueder partisipar al Seder “.

Pesah es la fiesta judia, la mas muncho selebrada en Amerika. Ma dingun prezidente aviya asistido a un Seder antes de Obama. Obama empeso esta tradision en el anyo 2009. El, mezmo aviya empesado esta tradision en el anyo 2008, un anyo antes de ser prezidente. Akel anyo, Obama aviya selebrado Pesah kon tres fonksionarios mansevos, en el Otel Sheraton en Harrisburg, Pensilvania. El anyo sigiente, kuando se izo prezidente, Obama selebro la fiesta kon su famiya, i kon los fonksionarios de White House, en la kamareta de komer de la rezidensia.

Los Obamas kontinuaron esta tradision por anyos. Estuvieron meldando la Agada de Maxwell House ke se melda la mas en las kazas judias del pais, desde los anyos 1930’s. En el Seder, los Obamas i sus envitados komiyan las komidas de Pesah, bazadas en las reseftas de las kazas del personel judio. Ma, la kuzina de White House no era supervizada por un rabino durante la preparasion de las komidas. Ansi, las komidas no eran totalmente kasher, ma se puede dizir, el estilo kasher.

‘Este anyo, lunes la noche, las komidas de Pesah fueron aparejadas por una kompania de catering kasher-por-Pesah’, disho el fonksionario de White House.

“Esperamos ke el Prezidente Trump va pueder asistir a un Seder en White House al anyo vinidero. El Prezidente, por siguro, va kerer kontar la istoria de la liberasion de la persekusion ke es muy emportante por el lider del mundo libre. Espesialmente mas emportante por este prezidente”, disho el fonksionario. “Puede ser al anyo vinidero, en Yerushalayim!”

Este anyo, todos se supsonaron de la kontinuasion de esta tradision. Un mez antes de Pesah, se pozo la kestion si esta tradision va kontinuar kon Trump, ke tiene una ija judia i inyetos judios, ma no vino dinguna respuesta de White House. Unos kuantos dias antes Pesah, el fonksionario de White House, disho a varios medios ke la “tradision de Obama” va kontinuar, ma Lunes la noche, Trump i su famiya no asistieron al Seder.

El evento de Seder no estava eskrito en el program ofisial de lunes de Trump. El program ofisial de lunes estava tan yeno ke eskapo a las 4:30 duspues la media noche. Siguramente, el prezidente no tiene ni una noche libre. Estos dias, munchas de las oras en su ajanda, estan okupadas kon los eventos de las krizas de seguridad en Siria i en Korea del Norte.

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın