Antes unos kuantos anyos, en mi pajina de “El Amaneser” aviya tresladado el rezume del livro sovre el “Estudyo del Talmud” i meldimos una pregunta semejante: “En kualo este livro, el Talmud es diferente de todos los otros livros?” Mos estamos ambezando ke antes de todo es una eksperiensa de la vida. Para pueder bien entender su kontenido kale djuzgar en partyendo de lo simple para arrivar a lo komplikado. Porke la realidad tyene en vezes nombrozos aspektos. Keridos amigos, aki vos kero prezentar una konseja, un kuento de manadero anonimo. En tresladandolo del fransez, perkuri a no pyedrer su efikachidad orijinal. Esta komo un tipiko egzempyo de la “Demarsha Talmudika”...
“A la fin de nombrozas negosyasyones kon las otoridades lokal, un savyo Djudio, un Talmudisto de Odessa reusho a obtener la otorizasyon de vijitar Moskova. Suve al treno, i se asenta en un lugar vaziyo. A la estasyon sigiente entra un mansevo i se instala djusto al lado del Talmudisto, del savyo aedado. El nikochiri todo en observando el mansevo, se mete a pensar: “Este mansevo no tyene la aparensya de ser un kazalino. Dunke, si no es un kazalino deve probavlemente bivir en este distrikto. I si es de este distrikto, deve ser siguramente Djudio, porke aki es absolutamente un distrikto Djudio... Ma, de otra parte, supozando ke es djudio, ande puede irse este mansevo? Porke yo so el uniko Djudio de este distrikto, ke reusho a tomar la permisyon de ir a Moskova...
“Ah, atansyon! En la banliyo serkana, antes de Moskova, ay un kazaliko ke se yama Samvet. Es el uniko kazal ande los djudios no tyenen menester de “laisser passer”. Ma, deke este mansevo va viajar asta Samvet? Sin duda, para vijitar una de las famiyas djudias de ayi. Veremos un poko... kuantas famiyas djudias biven en Samvet?.. Ah, solamente dos: los Bernstein i los Steinberg. Ma komo los Bernstein son antipatikos, este buen mansevo esta sin duda indo a vijitar los Steinberg...
“Ma, porke este mansevo va ir a vijitar los Steinberg a Samvet? Eyos tyenen solo dos ijas. Dunke este mansevo es probablemente yerno de los Steinberg. Ma alora, kon kuala de las dos ijas es kazado? Ya savemos todos ke Sarah Steinberg kazo kon un buen avokato de Budapest myentres ke su ermana Ester tomo un merkader de Zhitomer. Dunke el mansevo deve ser el marido de Sarah. Esto kere dezir ke se yama Aleksandr Cohen si no me yerro...
“Alora, si vyene de Budapest, kon este todo antisemitismo de ayi, se trokariya el nombre… Kualo es el ekivalente de Cohen?.. Es Kovacs. Ma si ayi, en Budapest achetaron ke troke el nombre, este mansevo deve tener un estatuto espesyal para pueder azer esto... Ah!... esto siguro, deve posedar un doktora de la Universidad... Mas nada no es posivle.”
Despues de djuzgar i arrivar a esta konkluzyon, el savyo Talmudisto se abolta verso el mansevo i le demanda: “Muncho pardon Dr. Kovacs puedo avrir un poko la ventana?”
“Siguro”, responde el mansevo bastante sorprendido. “Ma, komo konosesh mi nombre?”
“Bof!” responde el Talmudisto, “Esta tan evidente!”
Metyendo el punto final, kero transferar un pasaje del sovredicho livro: “…Aki mos gusta ser en chikos grupos, munchos grupos i mas grupos. En realidad, esto es el imajen de LA DEMARSHA TALMUDIKA: partir de lo simple para arrivar a lo komplikado. NADA NO ES SIMPLE. Kada aspekto de una “REALIDAD” tiene nombrozas fachas. Afilu si en vezes son kontradiktaryas, sinyifikan la “SESUDEZA DIVINA” ke no tiene fin”.
