Puedesh konoserla de mi reportaje de 2008 kon la kerida Beki Almaleh: El UNICEF ke lavora desde 50 anyos en favor de la infansia, imprimo una karta de Beki Almaleh por el bienestar de los ninyos del mundo.
Puedemos konoserte, kerida Beki Almaleh?
Nasi en Estambol en el anyo 1931 i eskapi en 1949 el Liseo Bene Berit. Mi enkontro kon el arte de marmolear fue en 1988 despues de retirarme en 1984 de la kompanyia Mobil Oil onde lavori durante 27 anyos komo sekretaria del Direktor de Kontabilidad i Finansas.
Keres aklararmos konsernando tu arte?
Despues del retiro, asisti a klasas de akuarela i de desen al karbon. Ademas, empesi a ambezarme a marmolear papeles en klasas ke fueron ensenyadas por Nusret Hepgül, un ofisyer naval retirado. Durante muestras klasas organizadas por la Turkish Cultural Service Foundation, muestro maestro mos ensenyo komo azer furchas kon pelo de kavayo, komo preparar las pinturas kon kolores tradisionales, en kurto komo marmolear papeles.
Muestro primer kurso turo kuatro mezes. Despues kije aprofondizar mis konosimientos en este arte i el anyo proksimo me enrejistri en un muevo kurso de tres mezes. I en 1992 asisti a un atolye durante un mez.
En akeyos anyos avia pokas personas ke savian lo ke es papel marmoleado. Pero agora despues de 20 anyos, kaji todos saven i apresian este arte. I esto mos alegra.
Oy en dia lavoramos en kaza. Amo muchisimo marmolear. Devo konfesar ke yo fui adikta del papel marmoleado desde ke lo konosi.
Somos los unikos marmoleadores en la komunidad Sefaradi de Estambol.
Mis lavoros fueron ekspozados en tres solo i 35 ekspozisiones kolektivas. Entre estas, la 5.ena Egzibision de Artes Turkos Tradisionales i la 4.ena Asamblea de Marmoleadores Internasionales. Dos artikolos sovre mi lavoro aparesieron en el Ink and Gall Journal en los Estados Unidos. UNICEF imprimio una karta de uno de mis papeles. Mi lavoro puede enkontrarse en el Museo de Arte y Antiguedades de Urumchi en la China i tambien en la Coleccion de Norma Rubovitz de la Biblioteca de Newberry en Chicago ansi ke en munchas koleksiones privadas.
En el Oriente, se kree que la mano del ‘marbler’ es dirijida por el Dio. La djente dize ke ago buenos papeles marmoleados. Kuando eyos demandan si tengo algunos sekretos para azer papeles asemejantes, les konto un koza ke okurrio durante muestro primer kurso. Kada vez ke mos preparavamos a marmolear, antes de avrir muestro resipiente, muestro maestro mos demandava de resitar una orasion i rogar la bendision del Dio por las almas de los viejos maestros muertos.
Esto es lo ke dainda kontinuo a azer. Ansi kreo ke kon la ayuda del Dio, es el
espirito de los viejos maestros ke me ayudan a azer buenos papeles.
El proseso de azer ebru puede pareser muy fasil pero nesesita un grado alto de abilidad. Es solo kuando ya alkanso a abilidad ke la persona puede kontrolar su lavoro.
En konkluzion, kero dizir ke el arte de marmolear papeles es muy komplikado en mismo tiempo ke es un arte fasinador.
Tuvimos el plazer de konoser kon munchos detalyos un arte tan diferente.
Grasias, Beki, por tu finesa i tu “savoir faire”.
Ke su alma repoze en Ganeden.
