La semana pasada era PURİM

Vijiti por la primera vez Israel en 1968 kuando tenia tredje anyos i el Konsolato organizava tures a Israel para ke los mansevos Djudios tengan la posibilidad de konoser el estado Djudio. I no vos pareska ke era una vijita de diyes dias komo oy. Yo me kedi kreo serka de trenta diyas i el grupo de mi ermana ke es tres anyos mas aedada ke mi serka de kuarenta diyas. Era reelmente un viyaje ande los mansevos tenian la posibilidad de konoser el pais. La segunda vez vijiti Israel vente i uno anyo dospues kuando me fui para el Kongreso organizado por la Asosyasyon Morit. El nombre del kongreso era: El primer Kongreso Internasyonal sovre los Djudios Turkanos. Reelmente vide muy grande diferensya en el payis en el interval de estos ventiun anyos. Topi un payis yeno de demokrasiya i avyerto a todo modo de ideas. Estava kon siertos Profesores de las universidades Turkas i mizmo eyos fueron impresionados kon el estado del payis.

I los ventisinko anyos dalkavos vijiti Israel munchas vezes ma nunka me se fado de estar en Purim en Israel. La semana pasada vijitimos tres diyas el pais kon mi mujer i dos evenimientos mos influenso: el primer era un konserto ke tuvimos la posibilidad de segir. El konsierto del famozo kantador Shlomo Artzi en una sala reelmente yena de djente ke konosen todas sus kantikas. Devesh de saver ke es reelmente muy difisil de topar bilyetos para siertos konsertos mizmo en Israel. I no vos olvidesh ke devesh de pagar muncho para tener un buen lugar.

Si no vos fuitesh a un konsierto en Israel mizmo las oras son un poko bichimsiz! Viernes a la una del diya. No se si en un otro payis puedesh topar tanta djente a estas oras?

A la salida, diya de viernes toda la djente vistidos en diferentes vestimyentas estavan kantando i baylando en siertos kafes o lugares de pasatyempo. Malorozamente no saviamos ke la plasa de Kikar a Medina era el lugar el mas emportante para ver miles de personas vistidas en diferentas vestimiyentas. Si estash en Tel Aviv no vos merikiyesh; ya puedesh merkar a 15 shekeles dos orejas, una grande kola i un papion para devenir un gato muy amavle komo izo mi mujer. El lugar el mas atraktivo kreo ke era el Bulvar Rochild. No syenes ma miles de personas vistidos de toda manera estavan en las kayes. Kaminimos muncho tiyempo en las kayes i vimos ke avia munchos partis en munchos klubes i lugares. Reelmente si no vijitatesh Israel en Purim no puedesh imajinar lo ke se aze en las kayes. I kreo ke es la mizma koza en todas las sivdades del payis. Un payis ke deve de defender sus frontyeras anyos i anyos, kon su puevlo yeno de enerjiya para englenearse un diya de fiesta …

  Antes de eskapar este artikolo devo de deklarar ke fui muy kontente de saver ke en la skola Ulus, en el Neve Şalom kon el Rabi Ashkenazi Mendy, en la Sinagoga de Ortaköy i en los klubes tuvimos evenimientos remarkavles ande todos los miembros de muestra Komunidad tuvieron la posibilidad de englenearsen.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın