Mos vamos a ver diya de Alhad

Silvyo OVADYA Köşe Yazısı
1 Mart 2017 Çarşamba

Ay anyos ke a mi mujer no le plaze ke avlemos kon mis amigos de los simiteryos. Ma komo era i so dainda dirijente de muestra komunidad, de vez en kuando devemos de diskutir komo un simeteryo es akseptable. Si vos fuitesh a Prag, en la rebublika Cheka puedesh ver en el simeteryo antiko ke las tombas son una ensima de la otra kon una diferensya de sesenta sentimetros de nivel. Porke entre kada muerte deve de aver una sierta kuantidad de tierra. I si lo savesh no puedesh enterrar en un terreno ande se topan siertas personas enterradas. I reelmente muestra komunidad tuvo siertos problemas kreados por syertos grupos muy relijiozos ke tienen por buto de protejar todo modo de simiteryo. Vemos mizmo en Israel ke el kamino (autorut) para las arabas de Tel Aviv a Hayfa troko de direksyon por un simeteryo. Es djusto ke devemos de respektar muestros muertes i muestros simiteryos, ma kreo sin egzajerar. Kuando adjuntimos un terreno a muestro simeteryo de Ulus fue un evenimiyento i pensimos si puediyamos enterrar uno ensima del otro. I kon el ayudo de muestros hahames i kon la aprovasyon de las otoridades ke se entienden de este modo de enterramientos dimos karar de azerlo. Ma ay serka de diez anyos ke no reushimos o no kijimos enterrar de una manera asemejante.

Ke tiene dar i aver el Diya del Ladino kon los simeteryos i la manera de enterrar la djente? El anyo pasado avli unos kuantos biervos sovre los Elementos Sefardis del Muzeo Djudio d’Estanbol, i pensava ke me devian de demandar si kero avlar en el Diya del Ladino. Viendo ke no me demandaron, dishe a Karen ke va avlar sovre las tombas eskritas en Judeo-Espanyol en los Simeteryos d’Estanbol. Lavori en el Simeteryo de Ulus i mizmo en la mueva partida i reushi a topar una tomba eskrita en Judeo-Espanyol. En el simeteryo ke poseda munchas tombas ke son eskritas en fransez (lingua de la Alliansa) porke una partida emportante de muestra komunidad fina los 70-80 avlavan en fransez, ay syenes mizmo miles de tombas ke son eskritas en Judeo-Espanyol. Tomi siertas fotografiyas i me kontenti de lavorar solo kon una kuantitad bastante de tombas (60-70 deas). Ma vemos ke en todas las epokas topamos tombas eskritas en Judeo-Espanyol. Normalmente los istoryanos azen bushkedades para topar siertos elementes istorikos. Mos akodramos de la famoza istoryana Israelyana Mina Rozen ke lavoro muncho tiyempo en el Simeteryo de Hasköy i kreo de Kuzguncuk i ke izo un grande echo kon su livro grande i mizmo pezgado (en sensia i en pezgo-bilgide ve ağırlıkta ağır). Dospues de este lavoro kreo ke devemos lavorar sovre las eskrituryas en Judeo-Espanyol ke se topan en muestros simeteryos.