Kon el komando del Kriyador, rekojo Moshe Rabenu a todo el puevlo Djudyo, i les enkomendo por la fragua del Tabernaklo (Mishkan santuvaryo). El les dyo a entender kada koza i koza klaramente ke manera tyene ke azerse. I los akavido antes de todo de no ezbivlar i azer ninguna ovra, mizmo para el Mishkan en diya de Shabat, syendo este diya es el prensipal sinyal del Djudaismo. I todo el puevlo kon muncha kerensya izyeron sus donos para esta ovra santa. Kada uno sigun su posibilidad… I enpesaron apunto en la ovra. Todos los savyos ke no mankavan de entre el puevlo de ombres i mujeres, lavoraron en esta santa ovra soto la direksiyon de Betsalel, niyeto de Hur del trivo de Yeuda i de Aoliav, del trivo de Dan. Enterval de 5 mezes se termino todo este lavoro. I se lo yevaron todo esto djusto sigun lo ke enkomendo el Dio. Amostro su kontentes i los bendisho. Sovre el komando del Kriyador ordeno Moshe Rabenu, i el Mishkan fue estrenado en el primer diya de Nisan de este anyo. Metyo kada koza en su orden. Las tavlas de la ley ke estavan en su tyenda, los pozo dientro el Aron Akodesh ke izyeron de un syerto palo de pino muy alavado nombrado Shita- Shitim. I kuvyerto de oro por adyentro i por afuera. I los tapo el Aron Akodesh kon el kaporet ke era una tavla de oro godror de un palmo, despues de azer todo lo ke enkomendo El Kriyador. Se kuvryo el Mishkan de una nuve. Esto fue un sinyal por el avenir, ke dizde akel diya, todo tyempo ke estava la nuve sovre el Mishkan no se meneyara el puevlo de onde estavan pozados. Kuando se alevantava la nuve, se levantavan el puevlo, i se ivan kaminando asta ke poza otra vez la nuve sovre el Mishkan, pozavan i eyos.
