La enorme pujita de manifestasyones antisemitas en Los Estados Unidos

Klara PERAHYA Judeo-Espanyol
1 Mart 2017 Çarşamba

‘Simple koinsidensya’ o puede ser ‘konsekuensa de un vyejo negasyonizmo relijyozo’ eredado de los primeros migrantes evropeos ke se instalaron, ay de esto unos kuantos siglos, sovre las tyerras muevamente konkistadas de la Amerika del Norte, desde la venida de Donald Trump al mas alto posto governomental, olas de antisemitizmo kargadas en mizmo tyempo de despresyo i de rankor paresen soplar aktualmente en la aktual atmosfera de los Estados Unidos.

Ainda la semana pasada, un simeteryo djudyo fue salvajemente profanado en Philadelphia, sinkyena mas grande sivdad de la Amerika del Norte.

Deke este rankor i este despresyo ke todos los dos paresen ser akuzadores? Puede ser un sentimyento ataviko de selo kaji salvaje en direksyon de ‘un puevlo ke supo sovrebivir durante dos milenaryos, atado unikamente a su Fey, i esto sin mizmo durante siglos i siglos tener el apoyo moral de sentirse independyente mismo sovre la ke fue su propya tyerra… mujeres i ombres munchas vezes rondjados de varyos lugares para ser resividos kaji syempre kon la mizma rankor i el mizmo despresyo por otros payizes raramente manko feroses.

Jonathan Greenblatt, Direktor egzekutivo de la ADL (Anti-Defamation League) deklaro ke la Komunidad Djudia Amerikana no vido un tal nivel de antisemitizmo desde los anyos 1930, poko antes la segunda gerra mundyal.

Ansi, en este momento, los djudyos (de ke lugar ke sean, de los Estados Unidos komo tambyen de otros lugares de la Diaspora) se topan delantre un enorme paradokso difisil a deshifrar:

Niguna persona puede afirmar ni simplemente pretender ke Donald Trump es individualmente antisemito; su ija es kazada a un djudyo ortodokso i eya mizma se apresuro a konvertirse a la Fey de su marido… Los ninyos ke nasyeron de esta unyon no son Kristyanos ma desendyentes de Moshe Rabenu i el aktual Prezidente de los Estados Unidos aksepto esta situasyon sin la mas chika opozisyon de su parte; al kontraryo, el parese estimar reelmente su yerno asta mizmo azer de el su konsejero personal… I malgrado esto, las manifestasyones antisemitas devyenen de mas a mas frekuentes i salvajes, komo si subitamente olas de zenofobia empesaron a surjir de una huente eskondida en las tinyevlas de los primeros siglos. 

A un djornalisto djudyo ortodokso ke le demando de ke manera el aktual Governo Amerikano tenia la intensyon de responder a esta subita pujita de antidjudaizmo, el aktual Prezidente de los Estados Unidos, al lugar de responder direktamente a la pregunta, deklaro kon ravya ke la kestyon era muy komplikada i indjusta i ke en todo kavzo el personalmente era la persona la manko antisemita ke egziste.

Esta manera de responder sorprendyo enormamente los otros myembros de la Prensa, los kualos pensavan ke era djustamente la okazyon para el prezidente muevamente elijido de afirmar su intensyon de estableser un fuerte programa de esforsos en el eskopo de meter fin a kualyer manifestasyon rasista.

 Segun lo ke eskriven munchos de sus komentadores, ay en la manera de replikar del Prezidente Trump: ‘elementos ekivokos difisiles a entender’. De una parte en uno de sus diskorsos el disho “Las amenasas kontra la komunidad djudia son orrivles i dolorozas; eyas mos azen akodrar el lavoro ke keda a azer afin de eradikar el odyo i los prejuisyos”. De otra vanda, el dia konsakrado al Jenosidyo de la segunda gerra mundyal, ninguna mensyon espesyal fue echa konsernando la Shoah ke vizava partikolarmente a eliminar totalmente los djudyos evropeos.

Diferentes interpretes reproshan a Donald Trump de nunka kondenar klaramente los grupos rasistos del partido de la “Derecha ekstremista”, tal el Ku Kluks Klan del kual el leader nombrado David Duke izo avyertamente kampanya por el kon su habitual slogan “America First”, slogan ke era tambyen el titolo de un grupo ekstremamente antisimito ke avia, en su tyempo, yamado los Estados Unidos a aserkarsen de Hitler.

‘Munchos otros analistos de su politika’ le reproshan sovre todo la omniprezensya de su prinsipal konsejero Steve Bannon, el tambyen grande antisimito i ex-patron del sityo Breitbart News. 

Ke seran las konsekuensas de la Prezidensya de Donald Trump sovre el desvelopamyento o el regreso de la sivilizasyon i del umanizmo no solo en los Estados Unidos ma tambyen en el mundo?