Es ke en Israel “la solusyon de dos Estados lado kon lado, el uno djudyo, el otro Palestinyano” fue enteramente enterrada? Es ke la vijita de Netanyahu en los Estados Unidos obtuvo el rezultado ke el aktual Governo ultra nasyonalisto Israelyano dezeava?
Kaji todos ya savemos ke desde largos anyos, la ONU (Organizasyon de las Nasyones Unidas) ansi ke los Estados Unidos i de mezmo munchos otros payizes del mundo refuzan por razones envezes diferentes: “la kreasyon de un Grande Estado Israelyano en el kual Djudyos i Palestinyanos puedran problematikamente bivir, atados a los mizmos preseptos sivikos”.
Komo todos ya lo savemos, en Israel, kaji todos los myembros del Governo aktual i partikularmente los ultra relijyozos i los ultra nasyonalistos reklaman de una manera kategorika la realizasyon de un semejante grande Estado, kuando por kontra los partidos sosyalistos de la Syedra ansi ke Yair Lapid, shefe del partido medyano “Yesh Atid” insisten sovre la kreasyon de dos payizes diferentes situados lado kon lado, kada uno independyente ma syempre kon un mizmo dezeo i una mizma voluntad de paz.
Es ke ay una mijor alternativa para Israel ke la de la prezensya de dos Estados, el uno djudyo el otro palestinyano; todos los dos (komo fue dicho mas arriva) independyentes i responsavles de sus desizyones, sometidos a las solas egzijensyas de un “respekto resiproko”, tal ke lo son los payizes los mas evoluados de la Evropa i igualmente de una grande parte de los otros kontinentes del mundo?
Si no es la totalidad, ma en todo kavzo munchos de entre mozotros djudyos de la Diaspora dezeamos tambyen kon ardor ke la totalidad del mundo sea sometida unikamente al kodigo moral de “la Deklarasyon de los Derechos del Ombre” bazado sovre las reglas de moralidad i umanizmo ke son (komo avia dicho René Cassin) las del Dekalogo de Moshe Rabenu.
Sovre kualo se baza el aktual governo Israelyano para egzijir kategorikamente la kreasyon de un uniko grande Estado djudeo-palestinyano? La repuesta a esta kestyon es muy difisil a topar.
En este momento la Prensa Israelyana eya mizma esta en estado de grande konfuzyon. Nombrozos gazeteros no topan un verdadero avantaje en la kreasyon de ‘Un solo Estado para dos puevlos diferentes’ mizmo si todos los dos se esforsaran de ser absolutamente solidaryos los unos a los otros.
De otra parte, todos por seguro savemos ke (a la eksepsyon de un punyado de hasidim ultra ortodoksos) la prokreasyon muzulmana en el futuro sera (komo lo es syempre) muncho mas ancha ke la djudia. Ansi, en kavzo de una semejante realizasyon, kualo sera del puevlo djudyo en 50 o 60 anyos, kuando la populasyon palestinyana va devenir mas nombroza ke la Israelyana?
Donald Trump ke al pareser no konose muy byen la importansa de este sujeto, deklaro kaji tekstualmente lo sigyente: “Miro la solusyon a dos Estados i miro la solusyon a un Estado i digo ke dezeo la ke sera eskojida por la mayoria.”
Estas palavras dichas kon una syerta indolensya son en realidad una deklarasyon dramatika ke tyene la posibilidad de modifikar lo ke fue a este sujeto ‘la politika amerikana durante la governansa de Clinton i de Obama’.
En este momento en Israel, los varyos myembros del partido de la Derecha ultra nasyonalista i relijyoza ke dezean la kreasyon de un solo grande Estado Israelyano el kual tendra tambyen sitizanos palestinyanos, se topan en la alegria de saver ke el aktual Governo Amerikano no va mas insistir sovre la kreasyon de ‘dos diferentes Estados independyentes’.
Benyamin Netanyahu ke fue interojado a este sujeto de parte de un djornalisto ke le demando ‘si la solusyon de krear dos Estados’ es realmente muerta, refuzo de responder de una manera klara i se kontento de afirmar ke sus primeras kondisyones no trokaron: Los palestinyanos devran absolutamente konsiderar Israel komo un Estado Djudyo i tambyen devran akseptar ke la armada Israelyana guadre el kontrol de la seguridad en Sisjordania.
Segun lo ke afirma David Horovitz, fundador i kapo Redaktor del sityo elektroniko “Times of Israel”: “En no kontradizyendo Donald Trump al sujeto del reziko de la solusyon de ‘Un Solo Estado’, Netanyahu desho kayer Israel”.
