Muevas bozes djudias de protestasyon se enaltesen en los Estados Unidos

Klara PERAHYA Judeo-Espanyol
14 Aralık 2016 Çarşamba

Komo no es un sekreto para ninguno, mas de la mitad de los djudyos de los Estados Unidos es partizana de una governansa demokratika del payis. Todo pusha muestros korelijyonaryos en direksyon de un semejante sistema governomental, el kual es muncho mas avyerto ke otros en sus konseptos i reglas, lo ke asegura la ‘igualidad de derecho sivikos’ entre los varyos sitizanos.

No se puede nyegar ke ‘dos mil anyos de erransya, kaji syempre a la bushkida de un payis ke los resivera voluntaryamente sin odyo ni desdenyo’ desveloparon en muestros ansestros (en mizmo tyempo ke una perpetual inkyetud) kualidades de perspikasia ansi ke de prudensya i sovre todo de ‘perseverensya en sus esforsos de mantenersen syempre en sus kreensa djudaika todo en kedando avyertos a los otros’.

En kual payis ke fuera, muestros leshanos avuelos fueron viktimas de la parsyalidad i de la indjustisya de monarkos ke la mas parte del tyempo eran krueles kon eyos i enfohados en sus voluntad imperativa de solo defender sus propyos korelijyonaryos, sin a ningun momento konsiderar el danyo ke esta manera de pensar puedra kavzar a los muevos venidos.

De esta manera “la preferensya de la mas parte de muestros ermanos amerikanos de kreensa djudia por el sistema demokratiko ke repoza sovre la absoluta igualidad de derechos sivikos entre todos los sitizanos” devyene muy fasil a entender.

Ansi, despues de la petisyon sinyada por ‘600 Hahahim i Hazanim’ de la kuala avlimos la semana pasada, kuatro otros grupos de djudyos liberales: ‘J Street’, ‘Americans for Peace now’, ‘T’ruah’ i el ‘National Council of Jewish Women’ se adjuntaron para demandar a Donald Trump de estudyar una vez mas las konsekuensas ke puedra tener ‘la nominasyon de Michael Flynn’ al posto de ‘Konsejero a la Seguridad del payis’ por kavza de sus sentimyentos antisemitos i de su ostilidad por el Islam ke el konsidera komo una ideolojia politika ke se eskonde detras de una relijyon monoteista.

De mezmo, en opozisyon a la nominasyon de Stephen Bannon al posto de ‘Alto Konsejero’ del muevo prezidente amerikano, munchos grupos djudyos syempre progresistos prezentaron mas de un milyon de sinyaturas al futuro governo, afirmando kon insistensya ke no ay lugar para un suprematisto de kuero blanko, antisemito, islamofobo i mizojino en la Kaza Blanka.

 ‘Esta tresera koalisyon djudia de la opozisyon’ es kompuesta prinsipalmente de varyos myembros djudyos del partido de la “Syedra demokrata amerikana” entre los kualos: ‘Jewish Voice for Peace’, ‘Bend the Arc Jewish Action’ ets. ets.

En desparte de esto, segun lo ke mos ambeza el mizmo sityo elektroniko: El Rabbino ‘Jason Kimelman Block’, direktor de la organizasyon ‘Bend the Arc Jewish Action’ deklaro mizmo ke, al pareser, Donald Trump dezea entornarse de personajes agresivos a las valores fundamentales del djudaizmo amerikano”.

A este propozito una kestyon mos vyene al tino: “Mizmo si eyas repozan sovre faktos absolutamente egzaktos (lo ke no dubyamos) asta ke grado estas keshas de muestros korelijyonaryos de los Estados Unidos puedran tener una influensa sovre el Prezidente Amerikano muevamente elijido”?

No mos olvidaremos ke entre los varyos myembros del partido de la ‘Derecha ultra ekstremista Amerikana’ se topa tambyen el presedente prezidente del ‘Klu Klux Klan’, personaje kruel en sus aspirasyones komo tambyen en sus aktos.

Visto la diversidad de los elementos umanos ke forman la totalidad del puevlo amerikano, kualas seran en el futuro serkano, la politika interyor i la politika eksteryor de los Estados Unidos?

Eske el muevo Governo tendra la eksperyensa nesesarya i sovre todo la voluntad de asegurar la koezyon i la igualidad de derechos sivikos entre los diferentes myembros del puevlo amerikano aun la diversidad de sus orijen i aspirasyones?

Eske Los Estados Unidos puedran syempre ser konsiderados komo la mas grande potensya del mundo?

 

Muestra dolor es grande, la Turkia de muevo en dolyo de 44 de sus sitizanos, por la mas parte jovenes valorozos de mas o menos 30 anyos, los unos muevamente kazados, otros ke deshan detras de eyos uno o dos guerfanos los kualos no konoseran nunka lo ke es la otoridad mesklada de amor de un padre.

Muestras kondolensas a las famiyas de los ke pedrieron la vida i refuah kompleta a los feridos.