Israel muy inkyeto delantre la multitud de insendyos ke sakearon sus tyerras

Klara PERAHYA Judeo-Espanyol
30 Kasım 2016 Çarşamba

Dospues las kalores envezes salvajes del enverano,  el otonyo es para munchos de entre mozotros el periodo simultaneamente el mas ermozo i el mas triste del anyo.

Ermozo kon su dulse freskor oras de tadre, sus arvoles entre los kualos ‘varyos se obstinan a kedar syempre vedres’ i lo mas importante, kon la esperansa de enkontrar de muevo ‘karas amigas’ dispersadas durante los dias kayentes en varyos otros lugares.

 Triste  kon su tapet de  ojas amarias ke kayen sovre los trotuares i ke  paresen lamentarsen kon chikos ruidos sekos debasho muestros kalsados, triste partikularmente oras de tadre, kon la obskuridad ke se apresura a kayer de mas a mas temprano sovre las kalejikas estrechas de varyos foburgos de la sivdad

En desparte de esto, el otonyo es malorozamente tambyen, komo lo vemos kada anyo, la sezon la mas propisya a la pujita de grandes insendyos, lo ke se produze partikularmente en las inmensas sharas o en kualkyer otros espasyos asekados dospues de nombrozos  mezes de  falta de luvya.

Ansi aktualmente, segun lo ke meldimos en la Prensa, desde el empesijo de la semana pasada, Israel fue konfrontado a una seria de huegos devastadores en varyos lugares del payis. 

Grandes espesyalistos  sovre este sujeto mos disheron ke “los primeros fuegos fueron la konsekuensa de una probable neglijensya (sin ninguna intisyon kriminal) de parte de los moradores de varyos edifisyos, neglijensya malorozamente mesklada a kondisyones meteorolojikas inadekuadas.

Ma mas tadre, la propagasyon de dia en dia mas frekuente del mizmo fakto,  pusho otros espesyalistos a pensar ke un treser faktor muncho mas grave se adjunto a las primeras previzyones.

I  a un momento, la probabilidad de ‘aktos asasinos adjuntados a  faktores aksidentales’ izo pensar a la posibilidad de un empesijo de intifada kriminal.

Segun las primeras estimasyones, nombrozos hektares de tyerra fueron atakados por las flamas; la partikular sekedad de la atmosfera de este anyo fasilito malorozamente sus engrandesimyento i ansi se produzyo la propagasyon de mas a mas rapida de muevos insendyos en una atmosfera kaji irrespiravle.

Djueves pasado, tres dias dospues del empesijo de la propagasyon de los insendyos en Haifa ande la elektrisidad manko tambyen en munchos foburgos, 60.000 (sesenta  mil)  moradores medyos sufokados por la terrivle densidad de los umos, fueron ovligados de abandonar kon presipitasyon sus domisilyo afin de salvar kada uno su vida.

Komo munchos lektores se akodraran, la mizma  rejyon  avia sido de mezmo fuertemente atakada en el anyo 2010,  kuando el Monte Karmel avia sido ravajado por un insendyo ke avia kavzado la muerte de 44 personas.

Grasyas al Dyo, aktualmente asta oy en dia, no uvo kavzos de muerte, ma por kontra munchos feridos entre los kualos uno se topa syempre en el ospital.

Segun lo ke meldi tambyen en la prensa, durante la noche entre djueves i vyernes flamas inmensas amenasaron esta vez  varyos espasyos serkanos  de los kazales arabos de Nazareth i a una distansya de 15 kilometros al Oeste de Yerushalayim.

Demanyana de Alhad, los responsavles de la sivdad de Haifa anunsyaron ke ‘una grande kuantidad de sitizanos ke avian abandonado sus moradas ya pudyeron retornar a sus kazas’, ma ke ainda 1600 otras personas se topan syempre sin domisilyo.

A notar tambyen ke entre 400 a 530 grandes apartamentos fueron fuertemente danyados por los insendyos de la semana pasada, los kualos destruyeron 28000 dunams (km2) de tyerra.

Binyamin Netanyahu  disho de su parte ke los aktuales insendyos kriminales fueron mas danyozos ke el huego del monte Karmel de 2010.

De mezmo (todo en lamentandose sovre los danyos materyales produzidos) el Primer Ministro de Israel afirmo ke grasyas a la  presyoza kooperasyon internasyonal, munchas vidas umanas fueron salvadas.

En efekto nombrozos payizes vezinos tal el Ayifto i la Jordania i poko mas leshos, la Turkia, la Gresya, Shipria, la Fransya i los Estados Unidos ets. ofresieron sin pyedrer tyempo sus presyoza kontribusyon, lo ke pusho el  Shefe del Governo Israelyano de propozar: “la kreasyon de una fuersa multinasyonal para luchar kontra  semejantes huegos mesklados al terrorizmo”.

No savemos si esta propozisyon se realizara, ma es una verdad inkontestavle ke “solo la solidaridad umana” puedra  un dia venser la kriminalidad i el odyo devastador de los djihadistos.