“Chaque génération, sans doute, se croit vouée
à refaire le monde. La mienne sait pourtant qu’elle
ne le refera pas. Mais sa tâche est peut-être plus grande.
Elle consiste a empêcher que le monde se défasse.”
Albert Camus
Si, el grande umanisto franses, Albert Camus eskrivyo ke “kada jenerasyon kreye ke eya es destinada a re-azer el mundo. La muestra portanto save ke eya no puedra re-azerlo, ma su lavoro es puede ser mas difisil a kumplir. Este lavoro konsiste a impedir el mundo de dezazerse.
Es ke ‘re-azer el mundo’ o ‘impedir ke el mundo se dezazga’ es posivle oy en dia? Esto es una kestyon a la kuala es muy difisil de responder.
Oy, mos topamos kaji undidos en una situasyon inekstrikavle: de una parte matadores inkonsyentes de la gravidad de sus aktos, pushados sin dubyo por un odyo al pareser irrezistivle. De otra vanda, la kulpavle indiferensya de una sosyedad ke (se puede prezumir) serra los ojos i se obstina a no kerer ni ver ni entender.
A ke momento ke sea, la Prensa Internasyonal se aze un dover de anunsyarmos los varyos evenemyentos del dia, por la mas parte trajikos, en kual lugar del mundo ke sea.
Despues de Kipur, dia de repentensya, munchas kestyones kontinuan a venirmos al tino konsernando todo lo ke se pasa en muestro entorno, kestyones ke mos akosan sin desharmos la posibilidad de pueder syempre topar kualkyer repuesta a dar, i esto por la simple razon ke kada una de estas preguntas es kompleksa en eya mizma, echa de valores diferentes i mizmo en vezes kontraryas las unas a las otras.
Desde el empesijo del Vente i Unyen siglo (aun la inkontestavle persistensya de la evolusyon syentifika en el espasyo de la medikeria i del byen-estar fiziko) mos topamos en una atmosfera de perpetual trajedia... kada dia ‘muertos’, kada dia padres i madres ke pyedren por syempre sus ninyos’… i tambyen en la parte enemiga, la ke no konosemos, kada dia mueren rezin nasidos sin kulpa ni pekado a los kualos no se rekonose el derecho de bivir, konsekuensa esta vez de los golpes aeryanos punitivos…
Es ke estos asaltos punitivos pueden ser impedidos?
El problema parese ser insoluvle, es ke kastigar los kriminales a igualidad kon la gravidad de sus propyos aktos inyovles, es la sola solusyon?
Ay de esto egzaktamente 35 anyos, el mueve Oktobre 1981, sovre la insistensya de Robert Badinter, el kastigo de muerte para los kriminales (kuala fuera la gravidad de sus aktos) fue suprimido en Fransya. Me akodro komo si era ayer la admirasyon kaji jeneral por este tan grande progreso en una lejislatura penal, progreso ke fue un maraviyozo paso echo en direksyon de un umanizmo ke va asta su ekstrema limite.
Byen antes la promulgasyon de este presepto en favor de la vida, en el 19en siglo, Victor Hugo avia dicho: “inflijir la pena de muerte es matar legalmente”.
Si … lnkontestavlemente el selebre eskritor franses tenia razon, ma es muy difisil, kaji imposivle, de azer otramente.
Puede ser ke en el futuro, en esta meskla de argumentos negativos mesklados a los pozitivos, chikas luzes se asyenderan, las kualas ‘adjuntadas las unas a las otras’ aklararan el kamino.
Es por esto, ke vos transmeto la traduksyon mas o menos literal de lo ke meldi en el sityo elektroniko nombrado “Times of Israel Français”:
“Ay de esto poko tyempo, el Grande Rabino Sefaradi de Israel, Yitshak Yossef, disho en un enkontro de ‘Relijyozos Israelyanos’ kon ‘Relijyozos Palestinyanos’: El puevlo djudyo no puede kedar indiferente delantre el Jenosidyo Siryano. Segun el sityo Walla, en este momento ande avlamos, ombres, mujeres i ninyos son asasinados en Halep kon armas biolojikas i shimikas ansi ke kon bombardamyentos aeryanos.
Miles i miles de refujyados estan sin domisilyo i tyenen ambre. Eyos no son muestros amigos ma son kriansas umanas ke sufren i ke se topan en un djenero de olokosto.
Dezeo utilizar este enkontro kon los palestinyanos para djustamente afirmar ke los djudyos no pueden kedar de marmol delantre semejentes kavzos.
El Jenosidyo en Siria o en kualkyer otro payis, no puede kedar inyorado, mizmo si los ke mueren no son muestros amigos.”
