Hatima Tova!

Silvyo OVADYA Köşe Yazısı
13 Ekim 2016 Perşembe

Savesh kualo es uno de los mas importantes problemas de los miembros de la Komunidad Djudia de muestro país (la Turkiya): una partida importante de la populasyon no saven meldar la ley en ebreo kon letras ebreas. I día de Kipur si no saves meldar es una angarya de ir al kal. Era trenta-trenta i dos anyos antes ke por la primera vez izimos un livro de las orasyones de kada diya - shahrit, minha i arvit - en ebreo ma kon letras latinas - ya puedemos dizir ke fue transliterado. Tuvimos diskusyones kon el Gran Rabino Asseo ke era en este posto estos anyos. Dizia ke no ay personas ke se van ir al kal porke estan meldando lo ke se esta dizyendo. A la fin reushimos a konvenserlo. Despues de este primer livro se publiko un livro de ley para la orasiones de Kipur i de Rosh Ashana i esto fue una okazion para mi. Ya me ambezi a meldar un poko kuando ize mi Bar Mitzvah ma esto no fue sufiziente para kontinuar i para segir las orasyones en los kales. I ay kreo trenta anyos ke me vo al kal kada diya de fiesta mizmo siertos diyas de Shabat.

Munchos anyos despues, un grupo ke s’estavan ambezando la Tora kon el Gran Rabino Haleva dieron karar ke devian de transliterar en letras latinas i mizmo trazladar en turko todas las orasyones mizmo los sinko livros de la Tora kon todas las Perashas tradusidas i komentadas. I kuando yo fui prezidente de la komunidad - no es kon mis esforsos - kada anyo mizmo doz vezes al anyo empesaron a publikar una seria de livros de ley.

Realmente esto fue un punto muy importante para los Djudios Turkanos. Es la Sinyora Ester Asa kon siertas personas ke la ayudaron ke realizo este lavoro maraviyozo. Realmente Ester es una persona ke lavora muy duro ma reushe  este modo.

En el empesijo mizmo me demando siertas kozas sovre la eskritura kompugrafika i la imprimeria de los livros ma en poko tiempo fue la maestra de este echo. Oy en diya, los Djudios de muestro payis mizmo si no saven meldar el Ebreo kon letras ebreas pueden ir al kal i meldar todas las orasyones en entendiyendo lo ke se esta dizyendo.

Este Kipur sere en el kal de Neve Shalom. Malorozamente esta sinagoga ke no tiene bastante de Yahides, diya de Kipur avren sus puertas a todos los ke keren vinir a arrogar al Dyo.

Malorozamente no semos una Komunidad muy manseva i los mansevos  no tienen muncha gana de irsen al kal. I este modo kada anyo tenemos mas poka djente en las Sinagogas de muestra sivdad. Ma este anyo komo el diya de Kipur es una data tadrada (geç), los kales de las islas mizmo si siertas son aviertas no ay munchas personas ke las frekuentan.

Hatima Tova a todos!