Kipur dia Santo de arrepentimyento i de perdonansya

Klara PERAHYA Judeo-Espanyol
13 Ekim 2016 Perşembe

Oy martes, demanyana antes Kipur, de kualo avlar si no del djudaizmo, de sus preseptos, kostumbres i tambyen  imperativamente de sus 10  komandamyentos.

Dos kestyones mos vyenen  kontinualmente al espirito: “Es ke  ovedesemos realmente a estos 10 komandamyentos ke Moshe Rabenu resivyo en el dezyerto?” i tambyen “Ke reprezentan, eyos, para mozotros i  ke mos demandan de kumplir?”

Para varyos de muestros ermanos:  “Un verdadero djudyo no tyene el derecho de tokar a la integralidad de los vyejos preseptos relijyozos (ke sean validos o no),  ni de mankar de respekto por la totalidad de las mitsvod ke fueron enunsyadas  ay de esto mas de 2000 anyos”.

Por kontra, otros de muestros korelijyonaryos, todo en syendo sinseramente buenos djudyos, kedan atados a las leyes i a los prinsipyos de sus avuelos solo en la mezura ande estos preseptos koresponden  realmente a la evolusyon de las kondisyones sosyo-kulturales ande mos topamos oy en dia.

Las varyas repuestas a estas preguntas son por seguro diferentes las unas de las otras.  Para mi: Lo mas importante es de ayudar a los otros ke mozotros mizmos i ansi ayegar a una situasyon de solidaridad i de respekto mutual, lo ke mos ambezara ke munchas vezes “dar alegria” devyene “resivir alegria”. 

‘El  real djudaizmo’ es antes de todo un umanizmo. Esta verdad mos vyene munchas vezes al tino i personalmente me syento ovligada de repetarla kontinualmente…

Kuando el Dekalogo fue dado a Moshe Rabenu, el fue (tal  ke lo afirman syertos grandes savyos) para ser distribuido a todos los ombres i mujeres, kreentes o no kreentes, djudyos komo no djudyos.

Devemos akseptar ke kuando meldamos “no vas a matar” o “no vas a kovdisyar la mujer de tu vezino” no es solo del ombre ebraiko ni de la mujer ebraika ke se trata, ma del ‘Ser Umano’ kual ke sea.

Kipur  no es solo rekonoser muestros propyos pekados i demandar la induljensya de Dyo afin de resivir su perdonansya. Kipur es tambyen ambezarmos a perdonar las faltas de los otros, no solo en renunsyando a inflijirles un kualkyer kastigo, ma en no guadrandoles por syempre en muestro korason “rankor” ni “ravya”.

Perdonar es sovre todo ‘esforsarmos de azer entender kon sinseridad  al kulpavle, lo ke pensamos ser la gravidad de sus aktos, kualos sean los motivos por los kualos eyos fueron perpetrados i esto en kedando mozotros tambyen avyertos a lo ke sera su repuesta.

‘No saver realmente perdonar al ke  konsideramos komo kulpavle, no azer mozotros tambyen el mas chiko esforso para entenderlo’, es munchas vezes de muestra parte ‘un akto igualmente muy grave’. 

Ansi, ay de esto unas kuantas semanas fui personalmente muy desgustada kuando meldi en una revista djudia, ke “en los Estados Unidos un grande rabino eksesivamente relijyozo deklaro kalmamente i kon  grande konviksyon, ke el shifro de muertos djudyos durante la Shoah no fue de 6 milyones ma simplemente de un milyon. 

Sovre baza de kual presepto este grande relijyozo se permetyo de nyegar  ‘el derecho al djudaizmo’ de los otros sinko milyones?

Kual sea su rango i su saveduria, es ke este eminente Haham no se yerro en konsiderando komo ‘verdaderos djudyos’ solo los ke son absolutos  kreentes ansi ke los  haredim ke (de la demanyana asta la noche) repetan lo ke se topa eskrito sovre  vyejos dokumentos o livros, entre los kualos (es verdad) munchos fueron puede ser muy presyozos en sus tyempo, ma en sirkunstansyas totalmente diferentes de las ke eran las de los orrivles dias de la Shoah.

No se realmente si  tengo o no tengo razon de revoltarme. Ma es ansi mi opinyon. Hatima Tova a ‘todos’ los djudyos!