“Si egziste la paz, egzistira la segurita.”
Shimon Peres, Mueven Presidente de Israel, entre 2007 asta 2014, fue presentado el Premio Nobel de Paz en 1994, por el lavoro ke izo por el Akordo de Oslo, endjuntos kon Itzhak Rabin i Yaser Arafat.
Murio el 28 de Septembre, 2016. La seremonia de funerales se realizo en el Monte Herzl de Yerushalayim.
Los presidents i lideres de 70 payises del mundo se reunieron por el d’alkavo omenaje.
Representaron sus payises: Barak Obama, Presidente de E.E.U.U.
Mahmut Abbas, Presidente de Palestina, François Hol–lande, Presidente de Fransia, Valentina Matviyenko, Federasion de Rusia, Bill Clinton, ex-Presidente de E.E.U.U. Tony Blair, ex-Primer Ministro de Ingletierra, Feridun Sinirlioğlu, diplomato de Turkiya, ex-embasador en Tel Aviv.
Abbas fue invitado spesialmente por la famiya Perez.
Binyamin Netanyahu a Mahmut Abbas:
“Apresimos vuestra presensia i vijita en este dia de dolyo. Paso muncho tiempo de muestro ultimo enkontro.”
Barak Obama se torno a Mahmut Abbas para rengrasiarlo: “Un grande jesto de vuestra parte. Mos izitesh akodrar la kestion de la paz ke fina oy no se pudo alkansar...”
El Presidente Barak Obama en su diskorso alavo i rengrasio Shimon Peres por sus esforsos de azer paz kon los Palestinianos. Repeto una fraza del Defundo:
“Los Judios no nasieron para dirijar otras nasiones. Semos kontra el esklavaje.”
Netabyahu disho:
“İsrael esta en dolyo, el mundo esta en dolyo. La erensia ke mos desho da fuersa al mundo entero...”
SHANA TOVA
Para munchos anyos, keridos lektores.
Esperamos una paz durable en muestra planeta.
