Albert Einstein ansi ke la influensa de la muzika en su ovra syentifika (3)

Klara PERAHYA Judeo-Espanyol
28 Eylül 2016 Çarşamba

Si… komo fue dicho en mi artikolo de la semana pasada: “Profundamente umanisto i grande pasifisto, Albert Einstein fue syempre muy sensivle a la sufriensa de kualkyer persona o puevlo en estado de servitud debasho la otoridad de potensyas ajenas.

Por egzempyo, en  los Estados Unidos ande el se avia instalado definitivamente en 1933 despues de aver fuyido de la Almanya nazi, Albert Einstein deskuvrio “el desdenyo delkual los pretos eran las viktimas, lo ke lo pusho a  bivir en una de las komunidades de estos mizmos pretos afin de pueder  observar de serka la segregasyon de la kuala eyos eran los martires, i a luchar para ke ‘los ninyos de kolor bruna’ tengan los mizmos derechos ke los blankos a azer ‘altos estudyos eskolaryos’ en el buto de desvelopar sus saver syentifiko komo tambyen literaryo o sosyal.

Grande amigo del kantador preto Paul Robezon, Einstein milito kontinualmente  kon ardor a su lado kontra el rasizmo amerikano de entonses. Ansi, en una konferensya ke el avia akseptado de dar en la Universidad Lincoln en 1946, el grande syentifiko deklaro; “So simplemente de pasaje en esta sala, sovre baza de una razon muy importante ke vos kero komunikar; al pareser los ke no tyenen el kuero klaro kontinuan a ser separados de los blankos, i yo dezeo dezirvos ke esta segregasyon no rezulta de una hazinura de los pretos, ma simplemente de un mal terrivle del kual sufren los blankos eyos mizmos”.

De mezmo, en la epoka del Maccartizmo, el se esforso de salvar de la deskonfiensa i del odyo, los ke tenian un ideal fuertemente sosyalisto.

En desparte de esto, munchas personas pensan mizmo oy en dia ke Albert Einstein fue el responsavle de la kreasyon de la bomba atomika i ke ansi el es kulpavle de la destruisyon de las dos sivdades japonezas “Hiroshima i Nagasaki”, lo ke no fue el kavzo.

Es verdad ke Albert Einstein fue el autor de la Formula  “E=mc2”,  ma el syempre kedo un pasifisto i un grande umanisto fidel a su respekto del ombre sin distinksyon de orijen ni de kolor de kuero.

El fakto fue ke al empesijo de la segunda gerra mundyal, syendo informado ke la Almanya Nazi ya estava, eya, esforsandose de fabrikar armas muy sofistikadas de un poder de destruksyon enorme, kon la intensyon de anihilar los ke eya konsiderava indinyos de bivir, Albert Einstein se sintyo moralmente ovligado de mandar una letra a Theodor Roosevelt  para komunikarle el kavzo, lo ke tuvo komo rezultado la akselerasyon del projeto nombrado “Manhatan” del kual el objetivo era djustamente la fabrikasyon de la dicha bomba a utilizar unikamente en sirkunstansyas de reziko vital para el payis.

Los ombres de syensya  ke en realidad fueron kargados de la konkretizasyon del proyekto “Manhatan” sovre baza de la Formula “E=mc2”  fueron: ‘Niels Bohr’, ‘Richard Freyman’ i ‘John Von Neuman’ ma no Albert Einstein, por la simple razon ke (por un semejante lavoro) syertos politisyanos amerikanos  mankaron de konfiansa en el pasifisto absoluto ke el era.

Aun esto,  la destruisyon de Hiroshima i Nagasaki ande miles i miles de  personas por la mas parte inosentes muryeron, fue uno de los mas pretos momentos de la vida de Einstein.

Anyos antes,  el avia dicho: “muestro objetivo de mozotros pasifistos es de konvenser kualkyer ombre i mujer, de la immoralidad de la gerra i de este djenero de esklavaje ke es el servisyo militaryo”.

Inkontestavlemente el no era un ombre de gerra ma de vida, el nunka bushko el pleto ma la paz i la armonia… esta mizma armonia ke el topava en la muzika de Mozart, Bach, Shubert i otros.

Segun lo ke mos ambeza Shawna Halevy, myembro del grupo syentifiko LPAC: “Sovre la insistensya de su madre, Albert Einstein estudyo el violin desde su ninyes i a la edad de 13 anyos, el se pasyono por las sonatas de Mozart.

A notar tambyen ke munchos otros de sus komentadores afirman el rolo muy probable de la muzika en sus deskuvyertas Syentifikas.

Segun lo ke  meldi, Einstein el mizmo deklaro: “La imajinasyon es mas importante ke el saver; la saviduria es limitada, myentras ke la imajinasyon puede envelopar el mundo, i yo so bastante artisto para pueder libremente ekstraer muncho de mi imajinasyon.” I tambyen, “La deskuvyerta de la relatividad restrinyida me vino al tino intuitivamente, i la muzika era la fuersa motrisa ke se topava detras de esta intuisyon.”

El tambyen tenia el uzo de dezir “Si yo no era un fizisyano por seguro ke seria un muzisyano; penso munchas vezes de una manera muzikal, veyo mi vida de una manera muzikal i la mas parte de mis alegrias me vyenen de la muzika”.

Fue ansi, keridos lektores, de uno de los mas prestijyozos ombres de syensya, syempre enamorado de paz, solidaridad, libertad, saviduria … i de muzika, esta muzika ande kada fraze parese aparejar la sigyente.