Un dia, Albert Einstein avia tekstualmente dicho: ‘la Valor Moral’ no puede ser rem-plasada por ‘la valor Intelijensya’, i digo Grasyas al Dyo.
‘Esta sola afirmasyon’ mos da la dimensyon etika de lo ke fue la vizyon del grande savyo en el espasyo de su enorme lavoro syentifiko.
Albert Einstein nasyo en la sivdad nombrada Ulm de Almanya, en data del katorze del mez de Marso 1879 de un padre i de una madre todos los dos djudyos, los kua-los (aun ke eyos mizmos no eran praktikantes) dyeron a sus ijo una edukasyon djudia a la kuala, al empesijo i por un kurto tyempo, el se sintyo muy atado, asta mizmo reproshar a sus jenitores de no observar la ley djudia.
En su chikes el fue un ninyo mas o menos difisil a deskrivir; munchas vezes atipiko i eksentriko en la sinyifikasyon absoluta de la palavra.
A la edad de sinko anyos Einstein tuvo un primer kontakto kon la Syensya grasyas a una brushula (boussole) ke el topo en un kanton de su kaza, i a la edad de dodje anyos fue lo mezmo grasyas a un chiko diksyonaryo de jeometria.
En su adolesensya, el tuvo un enkaminamyento eskolaryo muy perturbado… El se revoltava kontra el poder absoluto de varyos profesores ke kerian egzersar sus in-fluensa sovre los estudyantes i es ansi ke el fue konsiderado komo un elemento re-fraktaryo, muy difisil a edukar.
Dospues sus estudyos primaryos, Albert Einstein empeso su eskolaridad en el “Luitpold Gymnasium” del kual el fue rondjado a la edad de 15 anyos.
Es verdad ke el tenia ekselentes rezultados en Matematika i Fizika, ma refuzava de estudyar la biolojia i las syensyas umanas. Para el la syensya devia ser el fruto de la refleksyon i no de tekstos ambezados de memorya.
A la edad de 16 anyos el dezeo salir de su payis de nasimyento i integrar al Insti-tuto Politekniko de Zurih ke resivia estudyantes sin egzijir el bakaloreato, sovre ba-za simplemente del rezultado del egzamen de entrada, al kual tambyen Einstein no reusho; ma los egzaminadores ke avian deskuvyerto su potensyal de intelijensya i de razonamyento personal, le konsejaron de revenir al anyo sigyente dospues de una mueva preparasyon en la Eskola Kantonal de Aarau, syempre en Suisa, ande el topo una atmosfera muncho mas avyerta ke en su payis de nasimyento i en la kuala los estudyantes eran pushados a refleshir individualmente.
Byen entendido, Albert Einstein reusho el segundo egzamen, lo ke le permetyo de entrar en el muevo espasyo estudyantino ande el tuvo la okazyon de enkontrar el matematisyano Marcel Grossmann ke le ayudo mas tadre en geometria.
Ansi, el kontinuo a estudyar i a aprofundir de una manera autodidakta todo lo ke se topava en varyos livros sovre sujetos ke le eran de una importansa kapital.
El anyo 1905 fue partikolarmente fruktuozo para Albert Einstein, kuatro de sus artikolos syentifikos sovre la relatividad restrinyida (restreinte) fueron publikados en la selebre revista “Analen der Physik”.
En 1911, el fue invitado al kongreso Solvay ande enkontro Marie Curie, i unos kuantos anyos mas tadre, en 1914, poko antes la primera gerra mundyal, el fue eli-jido Direktor del Instituto de Fizika de Berlin.
Es en1915 o 1916 ke el prezento el manuskrito sovre su teoria de la ‘Relatividad Jeneral’ a la seksyon de Matematika i Fizika de la ‘Akademia Real de Syensyas i de Letras’ de Prusya.
De otra vanda, en el anyo 1920, el fue testigo de la insesante intensifikasyon del nasyonalizmo en Almanya i de la emerjensya del ‘nazismo’, lo ke fue konfirmado dos anyos mas tadre por el asasinato del ‘Ministro alman de los echos eksteryores’ ke era djudyo.
Albert Einstein fue Loreato del premyo Nobel en 1921 i de la medalya Copley en 1925.
Tambyen mas tadre, en 1927, el fue kombidado al Sinken Kongreso Solvoy i en 1928, nominado prezidente de la Liga de los derechos del Ombre.
La medalya Franklin le fue de mezmo desernada en el anyo 1933, en los Estados Unidos ande el se avia instalado definitivamente.
No mos olvidaremos ke el fue el autor de la ekuasyon E=mc2.
Byen entendido, una kestyon mos vyene munchas vezes al tino: ‘Kuala fue la verdadera relasyon de Albert Einstein kon el djudaismo?’ El dizia syempre “so kontente de apartener al puevlo djudyo ma por kontra no lo konsidero komo el puevlo elijido”.
Simon Veille dize ke el raporto del grande Ombre de Syensya kon el djudaismo era laiko i antirelijyozo. Para Einstein, el Djudaizmo reprezentava un asemblaje de tradisyones i de rekomendasyones etikas, ma no una relijyon.
A kontinuar en la proksima publikasyon del Şalom.
