Komo fue dicho en el ultimo paragrafo del teksto de mi artikolo de la semana pasada , en el anyo 1754 akontesyo un djenero de milagro en la vida de Moses Mendellsohn kuando el tuvo la okazyon de enkontrar i konoser de serka el afamado filozofo alman Gotthold Lessing ke devino uno de sus amigos los mas sinseros.
Gotthold Lessing era uno de los mas fuertes instigadores del movimyento sosyo-intelektual ke dominava en Berlin debasho el nombre de: “el siglo de las luzes”
Grande intelektual, ijo de un selebre theolojyano Kristyano, el no era muy relijyozo i adherava a la filozofia pantheista de Spinoza sovre la kuala Mendelssohn tambyen eskrivyo un ovraje.
Antes mizmo de su enkontro kon Mendelssohn, Gotthold Lessing ya avia empesado su lavoro de “Toleransa i Avyertura al Otro” en publikando una ovra dramatika intitulada “Die Juden” mostrando ke un djudyo puedia kumplir aktos de grande noblesa de karakter, lo ke prealablemente no era la opinyon ke dominava en la grande sivdad Jermanika..
Diferentes thezis a este sujeto mos dizen ke “el siglo de las luzes” komo tambyen mas tadre su ekivalente djudyo “la Haskala” fueron movimyentos kontra las opresyones relijyozas i politikas de akeya epoka.
La palavra Haskala sinyifika “Edukasyon” i ansi su introduksyon en las komunidades djudias de la Evropa durante la segunda mitad del dyez i ochen siglo fue el empesijo de ‘una modernizasyon del djudaizmo’ ke egzerso su influensa asta la segunda gerra mundyal.
Es grasyas a Lessing ke Moses Mendelssohn, chiko djudyo korkovado i otodidakto ke no avia visto banko de eskola, fue apresyado de parte de prestijyozos intelektuales Almanes por sus ideas i aspirasyones de emansipasyon.
Mendelssohn fue tambyen akseptado en los afamados Salones Intelektuales de Berlin ande el tuvo la okazyon de diskutir de igual a igual kon multiples grandes universitaryos a los kualos el izo konoser el djudaizmo.
No mos olvidaremos ke en la primera mitad del 18 en siglo, kuando en la Evropa “el Movimyento kristyano de las Luzes” se topava kaji en su punto el mas alto, pokos eran muestros korelijyonaryos ke tenian la autorizasyon de entrar en la prestijyoza sivdad almana.
Komo dicho la semana pasada, los djudyos bivian jeneralmente ahuera de las grandes aglomerasyones kristyanas, en chikas moradas ke les eran apropyadas, vestidos de una manera diferente de la ke era uzual en el payis. La mas parte de entre eyos, mankos de kualkyer kultura filozofika o syentifika, eran kontinualmente enfohados en la lektura de varyos pasajes de la Biblia i del Talmud ke eyos kontinualmente estudyavan en sus absoluta literalidad.
Defensor del adelantamyento djudyo, Mendellsohn fue komo un muevo eskalon en direksyon de una inkontestavle evolusyon de la manera de pensar de munchos de muestros korelijyonaryos.
Sus teorias interesaron no solo munchos de sus serkanos ma tambyen una grande kuantidad de otoktones almanes ke insistyeron para ke se konvertise al kristyanizmo, lo ke el refuzo kategorikamente. En su ovra nombrada “Yerushalayim” (Jerusalem) el deklaro frankamente ke preferava el Djudaizmo.
En realidad, la Haskala fue un procesus natural de rasyonalizasyon en la lektura de los Tekstos Santos djudyos i ansi un movimyento kontraryo al obskurantizmo i a las superstisyones ansi ke a todo lo ke es irrasyonal i arbitraryo.
No mos olvidaremos ke ‘syertos tekstos ke mos kedaron del pasado’ fueron eskritos debasho la influensa de ‘kondisyones de vida’ propyas a la epoka ande eyos fueron formulados.
Nombrozos entre muestros korelijyonaryos atados de una manera absoluta a una lektura integralmente literal de las Eskrituras Santas, pretenden ainda oy ke Moses Mendelssohn fue relativamente responsavle de la pedrita de la Espesifidad Djudia.
Eyos provablemente se olvidaron ke desde los tyempos medyevales, en los dodjen i tredjen siglos, otros grandes savyos esta vez de las tres relijyones monotheistas, tal: “Averoes, Muzulmano- nasido en Kordu/Cordoue en 1126”… “Maimonides, Djudyo nasido syempre en Cordoue en el anyo 1138”…. i “St Thomas d’Aquin, Kristyano nasido en İtalya en 1224”, fueron los primeros a ser partizanos del dezeo de una rasyonalizasyon de los konseptos relijyozos.
“La Epoka evropea de las Luzes” komo tambyen “la Haskala” del 18 en siglo fueron la evolusyon de la manera de pensar heredada de akeyos tyempos i un paso de mas echo en ‘el progreso de la toleransa’.
Lojikamente esto devia aparejar un renforsamyento de la solidaridad humana, lo ke malorozamente no se realizo tal ke lo vimos durante la segunda gerra mundyal i ke vemos aktualmente malgrado la publikasyon de la “Deklarasyon de los derechos del ombre”.
Oy en varyos lugares, munchos myembros de varyas relijyones, en sus dezeo loko de radikalizasyon de la Fey a la kuala eyos apartyenen, devinyeron mas feros ke las bestyas salvajes?
