Alüminyum Hurda Geri Dönüşüm

La verdadera felisidad -2

Tomando la sigunda kashika mas pezgada ke la primera, meldaron: “Sİ PENSAS KE EL ORO TE DARA FELİSİDAD AVRE ESTA KASHA”. Ke pregunta ! Siguro ke yo sere muy riko, poderozo i orozo disho el mansevo, a kualo le respondyo la madre:

La verdadera felisidad -2

“İjo miyo, no pensas ke la salud es un grande trezoro? A kualo syerve la rikeza si no tenemos sanedad i alegriya?”.

El ijo no respondyo, avyo la sigunda kahsa i enduna la nikochera vido sus ijos echando gritos, baylando komo los lokos a la vista de los oros. Kon grande esforso reusho a kalmarlos.          

A la fin, entero chapeteado, el ombre disho: “Kualo aviya dicho yo?..Una kazika?!! ..No un palasyo kon lajas de marmol, paredes de sedro,(sedir ağacı). Kero pasear en una karosa akompanyado de munchos mosos”.  “I Yo,” disho su mujer “Kero vestirme komo las prensesas, una korona de diamantes i aniyos presyozos”.

“El todo poderozo voz arregalo una rikeza ke no meresitesh .Agora ke tenesh muncho bueno, devesh pensar a los desfortunados” les disho la madre. Ma el arador i su mujer, embolvidos en la kontemplasyon de los oros dechidaron de avrir la tresera kasha, ke asigun eyos deviya kontener perlas i diamantes. El ombre ya aviya empesado a sintirse tal un rey. La mujer pretendyendo ke la mitad del trezoro era su dirito, (hak) estava azyendo iluzyones: sus vestimyentas ivan a ser tan manyifikas, ke la reyna i las prensesas afilu, se ivan a selar.

El arador, ke entremyentes, ya aviya reushido a meldar la eskritura de la tresera kasha, grito kon birra (öfke): “Kayate un poko, no digas lokuras!. Mira lo ke ay eskrito en esta kasha”.. “EL KE ME AVRE PYEDRE TODO LO KE POSEDA”.

El ombre, no keryendo riskar, disho ke lo ke teniyan era bastante i lo mijor iva ser enterrar de muevo esta kasha .Ma la mujer en dezakordo, keriya a todo presyo avrirla. El arador, kon un resto de ezitasyon, a la fın no podyendo rezistir a las rogatinas i amenazas (tehdit) de su mujer i malgrado los avertisimyentos (uyarı) de la madre, avyo la kasha.

El sielo, klaro fin akel momento, en supeto se eskuresyo, la tyerra tremblo, una tempesta violente empeso. Marido i mujer kayeron dezmayados del espanto. Kuando vinyeron en si, vyeron ke las dos primeras kashas aviyan desparesido i de la tresera, dos imensas formas umanas estavan aparesyendo entre el umo. Eran ADAM i HAVA ke les deziyan: “Vos topatesh en la mizma situasyon de las personas ke djuazgatesh, i fuitesh tambyen sombayidos.”

Ansi dizyendo, desparesyeron deshando la tresera kashika vaziya. El arador i las dos damas kedaron terrorizados i fue la nikochera ke se remetyo la primera. Les disho kon kerensya: “La verdadera felisidad es saver kontentarse kon lo ke tyenes en la mano. No pensesh a estas rikezas ke vinyeron i se fueron en un momento”.

Paso un anyo…El profeta Eliau Anavi, pasando por los mizmos kampos, se topo enfrente de un tablo maraviyozo: el arador teniya un muevo nasido entre sus brasos ke su famiya, estavan kontemplando kon amor, todo en rengrasyando el sielo. El Profeta Eliau aserkandose le disho: “Porke razon es ke no te estas keshando malgrado ke lavoras diya entero? Te izites riko?”.

“Me embezi ke la vera felisidad no se topa en las rikezas, ma en la kontentes interyora. Tenemos un techo, un kampo ke mos da el pan, i demas, una kriatura mas presyoza ke todo el oro del mundo”…I la mujer, afishugando el bebe, disho: “Es verdad, estamos orozos.” A kualo, adjusto la madre kon  emosyon: “Agora puedo irme trankila (huzurlu), vyendo mis ijos tan kontentes i orozos.”

Kontente i el, de ver los mansevos en el kamino derecho, el profeta Eliau, los bendisho i se alesho djuntos kon su dishiplo.

Tresladado del orijinal (Contes et Lejendes D’Israel  A .Weil)

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın