Alüminyum Hurda Geri Dönüşüm

ERA un tyempo en PORTUGAL… -1

ERA un tyempo en PORTUGAL… -1

Este teksto lo realizi aprovechandome de unos, dos pasajes de lavoros miyos ke ize mas antes i en kualos ya aviya mensyonado  las fuentes ke konsulti myentres mis bushkidades

En “El Amaneser” de este mez (No 86) eskrivi un artikolo tratando de la “Memorya”, de arrebivir el pasado. Akodrandome de lo ke me ambezava mi Nono (de bm) sovre muestra Istorya, dishe ke desde mi chika edad ya konosiya yo muy bien la sinyifikasyon de 1492. Era el sujeto favorito miyo i esta kontinuando a serlo tambien.

Espesyalmente, ay unos 13-14 anyos me enteresi mas demaziya, de sorte ke ize artikolos tratando en jeneral de lo ke sigio la Ekspulsyon i naturalmente  los Marranos. Los anyos dalkavo, lavoros sovre las relasyones Hispano-Ebreas, el estado aktual de estas relasyones ets.. me travo tambien el entereso. Prepari unos, kuantos tekstos sovre este sujeto despues de azer bushkidades seryozas.

Me rendi kuento ke en avlando de los Marranos en mis lavoros, en mayoriya mensyoni los de la Espanya i tan poko los refujyados en el Portugal. Efektivamente, una grande partida de los ekspulsados de Espanya, entre eyos la ilustra famiya Nasi, eskojyeron el kamino mas fasil, mas serka i ayegaron al Portugal. Fueron otorizados de instalarsen en este pais, en pagando una syerta suma. Preferaron una vida de egzilados al lugar de transformarsen en “verdaderos” o “falsos” Konversos. Por una kurta perioda, no los ovligaron a konvertirsen al Katolisizmo. 

Al presipyo, el Portugal abrigo kaji 90.000 sefaradis ekspulsados de la Espanya. Estos djudios aviyan refuzado la konversyon. Esta jenerasyon  bivyo ansi  los 4 primeros anyos i despues en1496 fueron forsados a konvertirsen fin a la kreasyon de la Inkizisyon Portugeza en 1536. Son estos djudios ke fondaron muevas komunidades en el Sud-Este de Fransiya, en Amsterdam, en Londra i otras rejyones.

La Famiya Nasi, espesyalmente Grasia Nasi Mendes i su sovrino Jozef Nasi son importantes nombres en la Istoria Djudia. La vida de Dona Grasia es una kaskada de evenimientos ke se eskrivyeron en esta Istorya. Seya en Portugal, seya en los otros paises ande emigraron despues de la Inkizisyon Portugeza, en tal ke Marranos, sufrieron bastante. Forsados a achetar el Kristiyanismo, refuzaron i fueron ekspulsados del Portugal. Se refujyaron en Beljika.

En 1542 entonses bivda, Dona Grasia tomo toda la administrasyon de las finansas de la famiya, djuntos kon su sovrino Jozef ke, anyos dspues iva devenir su yerno. Posedavan una fortuna konsideravle provinyendo de las finansas Mendes en Evropa. Malgrado sus relasyones kon los soverenos de la epoka, tuvyeron de luchar kontra las presyones politik de los novles evropeos. Muy frekuente, fueron akulpados de protejar klandestinamente djudios i de pratikar eyos mizmo, en sekreto el Judaismo.

Jozef Nasi demando refujyo de Sultan Soliman el Manyifiko i ansi en 1554, la famiya Nasi se instalo en las Tyerras Otomanas. Jozef konosiya personalmente soverenos de la epoka i era tambien de grande kapachidad en las finansas, lo ke le asiguro un posto superior en el Palasyo Otomano. Konosiya bien la politika de sorte ke fue un konsejero importante. En los presipyos de 1560 el Sultan Soliman le izo dono de tyerras en Tiberias  para la realizasyon del proyekto komun kon su tiya Grasia. Fue nominado governor de estos lugares. Muryo en 1579.

Grasia Nasi Mendes syempre se entereso al triste estado de los Marranos de Evropa, lucho kontra la Inkizisyon. Kon la intervansyon del Sultan Soliman, konversos aprezados en Ancona fueron liberados, embiyados a las Tyerras Otomanas. Otros fueron egzekutidos kon el orden del Papa Paul  IV. Sovre esto, Dona Grasia deklaro “ambargo” al porte de Ancona.

Dona Grasia se instalo en Tiberias, prospero en el komerso de lanas, fondyo una Akademiya, eskolas i Sinagogas en sivdades otomanas. Ayudo los konversos fuyendo de la Inkizisyon. Su muerte en 1569, kavzo una imensa pena en las Komunidades Djudias.

En muestro proksimo artikolo vamos avlar de los Ultimos Marranos de Portugal.

a kontinuar

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın