Alüminyum Hurda Geri Dönüşüm

Avlando de aki de aya

Avlando de aki de aya

Muy frekuente, los tekstos ke eskrivimos en esta pajina peryen sus aktualidad asta ke arrivan a los lektores. O, mas egzaktamente, a un grupo de lektores. Naturalmente, si se trata de un moabet, una jeneralidad o un kuento rendido de algun evento sosyal, este retardo puede no tener grande importansa. Ansi no vide algun inkonvenyente de relatar la semana pasada el teksto sovre “Los Ermanos Straus” kon un chiko retardo. Ansi, ke ansi estamos en el anyo 2012, sentenaryo de la trajediya del Titanic…

Si se trata de un diya espesyal, aniversaryo o komemorasyon de un evento istoriko, de fyestas relijyozas ets…, a mi me plazeriya prezentar al lektor el teksto, antes del diya. Por egzempyo, en muestro jurnal munchas vezes se aze anunsyos de konsertos de solistos ajenos o de organizasyones sosyal, de egzibisyones de arte (o otras) de muestra Komunidad.  En kavzos semejantes, puede ser ke ay posivilidades de avizar el lektor antes ke pase la data. Siguro esto es mi opinyon i bazandome sovre mis eksperyensas ya se ke syempre no es posivle de azerlo.

Mizmo aki, en Estambol, no arresivimos todos el jurnal, el diya mizmo de su aparisyon, lo ke es muy normal. Konsiderando de este punto de vista, devo dizir ke una partida de los ke bivimos en la Kosta Evropea de muestra sivdad, semos un poko mas privilejyados!! En mirando de esta ventana, penso tambien a los lektores ke biven afuera Turkiya ke, en jeneral resiven muestra gazeta despues de kaji una semana.

Ya se keridos amigos, ke munchos de entre vozotros estariyash pensando ansi: “Al pareser ke Coya se olvido ke aktualmente egziste una teknolojiya ke se yama Internet!...”. Naturalmente ke no me lo olvidi. Munchos, esta manera alkansan a muestra gazeta el diya mizmo. D’akordo, ma no todos... Enfin, pasaremos al sujeto de oy…

En vezes penso ke los mezes de Tamuz i Av tienen komo un atadijo, (atadura?) una relasyon entre eyos. No se komo eksplikarlo. Empesaremos a avlar kon los diyas de Taanit de estos dos mezes. En unos kuantos diyas va ser el ayuno de “Shiva asar be Tamuz”, oganyo Alhad  8 de Julio. Este Taanit se aze en komemorasyon de la kayidura de Yerushalayim, despues de fuertes batalyas.

Tres semanas  despues de la okupasyon de la sivdad por el enemigo, en el 9  de Av, el “Beit Hamikdash” fue destruido. “Tisha Be Av” (oganyo el 29 de Julio) es diya de ayuno en komemorasyon de la destruksyon del Templo de Yerushalayim. Jeneralmente, la  perioda entre el 17 de Tamuz i el 9 de Av, es konsiderada komo perioda de dolyo. Las destruksyones del Primer Templo por los Babilonyanos i del Sigundo Templo por los Romanos akontesyeron en el 9 del mez de Av. Koensidensa trajika, i el termo final fiksado por el “Dekreto d’Ekspulsyon” en 1492, eskapo en un diya de Tisha Be Av.   

Portanto, Av no es solamente un mez de luto. Asigun el artikolo “The Meaning of Tu Be Av”, 6 eventos pozitivos se realizaron en el 15 de Av, azyendolo diya de festividads en el Kalendaryo Djudio. En este espasyo limitado es difisil de pueder sitarlos. Ma, puedemos avlar de “Tu Be Av”, la fyesta del Amor. La unika fyesta en este mez.

Las muchachas de Yehuda saliyan a baylar en las vinyas. İ los mansevos dezeozos de fondar una famiya, saliyan tambien kon la esperansa de topar una kandidata de novya. Las muchachas vestiyan fostanes blankos emprestados, muy simples por no afishar sus kondisyones de ijas de famiyas poderozas. En muestro kalendaryo Tu Be Av, tradisyonalmente marka la fin del enverano i de las fyestas djudias. El 15 del mez es nochada de lunar, komo uzamos a dizir, es “La Luna en kinze”. Djusto antes una semana, Tisha Be Av, otruna vez mos izo akodrar la İstorya Trajika del Puevlo Djudio. Dizen ke la Luna en kinze de Av simboliza el pasaje del dolyo a la alegriya. Aki una chika notisya. Seya el 17 de Tamuz, seya el 9 de Av, kayen en Shabat. El Taanit es en Alhad. Arresividos ke seygan, Amen

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın