Alüminyum Hurda Geri Dönüşüm

Una DEMANYANA de ALHAD en la KULA

Una DEMANYANA de ALHAD en la KULA

Estuve okupada seya kon los aparejos de las Fyestas, seya kon mis eskritas para “El Amaneser” ke, el lektor en serka va pueder konoserlas. Lavori sovre un sujeto bastante ondo ke me demando anchas bushkidades i una preparasyon de kaji tres mezes. Konsiderando las kalores ke no me permetyeron de lavorar kon ardor, se deve achetar kon induljensya esta larga perioda de preparasyon. Oy no kero avlar de sujetos seryozos. Vamos azer un poko de moabet i un torno a la Kula (por kuantena vez??!!)...

Alhad 19 Septembre, diya ke sigio Yom Kippur.. Desde el amaneser ya se viya ke iva ser un diya ermozo i kayente. La verdad no me estava dezeando ir al Bosfor, espesyalmente a Bebek ande uzamos ir en jeneral. En este modo de aver, Alhad no es muy atreante para mi. Ay tanto puevlo ke no topas lugar en los “cafés”, afilu un kantoniko para asentar en los bankos del parko!...

Fue djusto al momento de ezitasyon ke mos bushko mi ijo: “Aprontavos, en medya ora esto vinyendo a tomarvos. Eskojed el lugar ande preferash ir”. Aki, keridos amigos devo avrir una paranteza. Erev Kippur era muestro aniversaryo de kazamiento i naturalmente no tuvimos la posibilidad de fyestarlo. Alora, sin ezitar mas demaziya, dishe ke me keriya ir a Galata. Mi entisyon syendo de dezayunar en un café-patiseriya ke deskuvri en el sentro antes un syerto tyempo... 

Apenas estava dyez la ora, en la Plasa de la Kula vimos bastante turistos. Ya aviya ampesado el rango para suvir a la Torre. Oganyo, kada vez ke vijiti el Sentro de mi chikes, enkontri una muchidumbre de turistos, lo ke no se viya tanto los anyos pasados. Afilu en el kafiko denfrente la Torre, vide munchos turistos bevyendo chay o komiendo tost. Vyendo los turistos, troki de idea i mos asentimos en el “Kafiko de la Kula” komo uzavamos a yamarlo. Kere dizir antes mas de 60-65 anyos.

Era el lugar preferido de mi kerido Papa kuando tornava oras de tadre de Eminönü. Siguro tadradas de primavera o enverano, porke se asentava afuera (nunka aryento) syendo ke no somportava la golor i el umo de sigaros o nargiles. I akel Alhad mos asentimos en el mizmo lugar suyo. El dezayuno imprevisto fue mas muncho un buketo de rekuerdos miyos i relativamente mas muevos de mi marido. En kada sorviko de kafe o chay mos estuvimos akodrando un detalyo del pasado. El tambien konosyo bastante el sentro syendo ke morimos un syerto tyempo kon mis djenitores despues ke kazimos. 

Agora viniremos a mi deskuvyerta ke mensyoni, sin dar el nombre del café-patiseriya K... No kero tomar el risko de azer “reklama”. Lo ke puedo dar komo indisyo, es muy serka del Ospital San Jorj. Si keresh ver un panorama inkomparavle, lo devesh deskuvrir antes ke pase la sezon. Para mi fue doble sorpreza. Ya konosi en pasadas el café serrado en el treser etaj del ansyano imoble, ke se suve kon asansor. Ma el Café ke estamos avlando es mas arriva, “en plein air”. Es muy vasto, porke se arresento sovre la anchura de tres imobles vizinos, donde una partida de mi Saffet Bey!.. La sorpreza miya fue djustamente de ver la primera vez, la kyoshe de la tarasa tan konosida de mi chikes i manseves. Solamente, para mas enalteserla adjustaron komo una manera de altura de beton, una konstruksyon. Ansi se gano una vista muncho mas ancha.

Alhad demanyana terminimos muestro nostaljiko torno sentimental de Galata asentados enfrente de este panorama ke mas o menos ya konosi desde tantos anyos. Diya de Alhad fue reelmente un regalo para mi, un rekuerdo ke no podriya topar en dingun “brunch” de un otel o un “café” del Bosfor.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın