Alüminyum Hurda Geri Dönüşüm

Una falsa akuzasyon (Un kuento de PESAH)

Una falsa akuzasyon (Un kuento de PESAH)

Asigun  la relijyon, arba de Pesah, es un dover de vijitar a la luz de una kandela, asta el mas chiko kanton de las kamaretas, para  estar siguros ke no kedo algun pedasiko de pan o “Hamets”. Lo ke se arrekoje, se mete en un lugariko, para kemarlo a la demanyana. Esto se yama la Seremoniya de “Hamets-Batteln”, en  Poloniya ande pasa muestro kuento...

El Rabbi de la Alt-Schul de Prague,  konformandose rigorozamente a este dover, kon la konsensya trankila, se fue a su kaza serka la Sinagoga. Estuvo vyendo esfuenyos negros, ande una boz le esta dizyendo: “No kontrolates muy bien tu kaza!!” Se esperto kon espanto i terrorizado, se alevanto, inspekto, no topo nada de Hamets. Alora, lo esperto  al “Shamas” i se fueron endjuntos a la Sinagoga. Empesaron a azer un kontrol minusyozo. Enfin, kuando se aserkaron del kanton ande se topavan la kupa de plata i otros atakanos servyendo a la seremoniya de Shabbat, se paralizaron del espanto: La kupa estava yena de sangre!…

El Rabbi agradesyo el Todo Poderozo, ke salvo otruna vez su puevlo de un perikolo i disho: ”Por siguro un enemigo muestro mos izo esta malisya, para destruirmos.” Kon el ayudo del shamas, izyeron despareser el Hamets. Incheron el vazo kon vino. Tornaron a sus kazas, dechidados de no avlar por la ora, a dingunos de este insidente.

Noche entera el Rabbi arrogo kon fervor para ke D. aleshe toda  amenasa para los Djudios de Prague. Al diya, el “Taanit Behorot”, kon la enkomendansa del Rav, no fue solo para los bohores, tambien i para toda la komunidad. La primera noche de Pessah, los Djudios de la Alt-Schul de Prague, se arrekojyeron en la Sinagoga. No estavan muy alegres, porke estavan konvensidos ke el taanit ke aviyan echo era para la liberasyon de Sallum, un buen djudio ke estava en prezo (porke este modo les aviya enkomendado el Rav). Las orasyones tanto asemejando a lamentasyones, estavan dando la impresyon de bivir una nochada de Tisha Beav.

En supeto, las puertas de la Sinagoga avyendosen kon brutalidad, entraron personas armadas, enkavesadas por un komisaryo. El Rav izo un djesto para kalmar su komunidad reseloza i les disho: “No vos espantesh ijos miyos. El Todo Poderozo esta kon mozotros. Si alguno tiene razones de akuzarmos, ke venga i lo aga”. Sovre estas palavras, uvo un grande silensyo. Vyeron un ombre kon una sonriza diabolika (şeytani), aserkarse de la “Teva”, tomar la kupa de plata  i darsela al komisaryo. El ofisyal vazyo el kontenido de la kupa, de manera  ke toda la asistensya veyga el likuido.

“Ke kere dezir esto?” grito kon sanya el majistrato. “Esto es vino! Este ombre se burlo de mozotros. Bandido,  mos enganyates avlando de sangre.”

El kalomniador (iftiracı) muerto del sar, enkantado, a la vista del vino. El mizeravle pensando ke esto era su fin, pudo solamente dezir: “El D. de Israel reelmente es kapavle de miraklos” i kayo dezmayado. La asistensya sin pueder entender lo ke se pasava. demando una eksplikasyon. Fue de muevo el komisaryo ke tomo la palavra:

“Tenesh muncha razon de enkantarvos, sinyores. Reushimos en este momento, a kitar en medyo, una manovra de un sharlatan sin igual. Este mizeravle vos akuzo de emplear la sangre de un Kristiyano para la fyesta de esta noche. Agora esto realizando ke malorozamente, munchas vezes vos tuvitesh topado enfrente de talas kalomnias i muy frekuente indjustamente akuzados.” Ordeno a los soldados de arrestar el mizeravle mentirozo. Despues se fue al governor de la sivdad, relatar lo ke akontesyo. Los Djudios akel anyo selebraron el Pessah, kon  grande fervor i egzaltasyon (coşku). Teniyan en sus korasones una rekonosensya imensa por la maraviyoza proteksyon del Kriador.

Contes et Légendes d’Israel

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın